Շաբաթ օրը Սերբիայի արևմուտքում և մայրաքաղաք Բելգրադում բախումներ են տեղի ունեցել ցուցարարների և ոստիկանության միջև, հայտնում է Associated Press-ը։
Դեմքերը շարֆերով փակած և երկրի նախագահ Ալեքսանդր Վուչիչի դեմ կարգախոսներ վանկարկող մի խումբ երիտասարդներ հրավառ նյութեր են նետել Վալևոյում Սերբիայի առաջադիմական կուսակցության գրասենյակի ուղղությամբ, որը գտնվում է մայրաքաղաք Բելգրադից մոտ 100 կիլոմետր հեռավորության վրա։
Նրանք հրկիզել են կուսակցության գրասենյակը, այնուհետև քաղաքի կենտրոնում բախվել ոստիկանության հետ։ Ոստիկանությունը կիրառել է արցունքաբեր գազով մի քանի նռնակ և շարժվել դեպի ցուցարարները, որոնք նրանց վրա շշեր, քարեր և հրավառ նյութեր են նետել։
Նմանատիպ բախումներ են տեղի ունեցել նաև շաբաթ երեկոյան հյուսիսային Նովի Սադ քաղաքում և Բելգրադում, որտեղ ոստիկանությունը արցունքաբեր գազ է կիրառել ցուցարարների դեմ, որոնք հրկիզել են աղբամանները։ Վալևոյում ցուցարարները փողոց են դուրս եկել՝ ի նշան «ոստիկանական դաժանության» դեմ բողոքի։
Ներքին գործերի նախարար Իվիցա Դաչիչը հայտարարել է, որ Վալևոյում առնվազն մեկ ոստիկան է վիրավորվել, և այս պահին 18 մարդ ձերբակալված է։ «Ձերբակալությունները կշարունակվեն։ Բոլորը, ովքեր խախտել են օրենքը, կձերբակալվեն», - ասել է Դաչիչը։
Դաչիչը հաստատել է, որ անկարգությունների ընթացքում վնասվել են Վալևոյի դատարանի, քաղաքային վարչակազմի և դատախազության շենքերը։
