Անցյալ ամսվանից «Վիպհա» արևադարձային փոթորիկի հետևանքով առաջացած ջրհեղեղներն ու սողանքները Թաիլանդում վեց մարդու կյանք են խլել և ավելի քան 230 000 մարդու կյանքի վրա են ազդել, հայտնում է AFP-ն։
Թաիլանդի բնական աղետների կանխարգելման և հետևանքների մեղմման դեպարտամենտի տվյալներով՝ հուլիսի 21-ից սկսած հորդառատ անձրևները ջրհեղեղ են առաջացրել 12 նահանգներում՝ հիմնականում հյուսիսային և կենտրոնական շրջաններում։
Թագավորության օդերևութաբանական վարչությունը կանխատեսում է, որ առաջիկա օրերին տեղումների քանակը կնվազի։ Թաիլանդում մուսսոնային անձրևներ են տեղում ամեն տարի՝ մայիսից հոկտեմբեր ընկած ժամանակահատվածում։ Գիտնականներն ասում են, որ մարդածին կլիմայի փոփոխությունը ավելի ինտենսիվ եղանակային պայմաններ է առաջացնում, ինչը կարող է մեծացնել կործանարար ջրհեղեղների հավանականությունը։
2011 թվականին Թաիլանդում տեղի ունեցած զանգվածային ջրհեղեղների հետևանքով ավելի քան 500 մարդ է զոհվել, ինչպես նաև միլիոնավոր տներ են վնասվել ամբողջ երկրում։
