ԱՄՆ նախագահ Դոնալդ Թրամփը շնորհավորական նամակ է հղել Ադրբեջանի նախագահ Իլհամ Ալիևին։
«Հարգելի նախագահ Ալիև, ամերիկացի ժողովրդի անունից ցանկանում եմ շնորհավորել Ձեզ և Ադրբեջանի ժողովրդին Անկախության օրվա կապակցությամբ։
Մենք բարձր ենք գնահատում հարաբերությունները Ադրբեջանի Հանրապետության հետ, ինչպես նաև Ձեր ջանքերը Միացյալ Նահանգների հետ ահաբեկչության դեմ պայքարում, էներգետիկ անվտանգության առաջխաղացման և Ձեր հարևանի հետ խաղաղության հասնելու գործում։
Մեր հարաբերությունները զգալիորեն զարգացել են դիվանագիտական հարաբերությունների ավելի քան երեք տասնամյակի ընթացքում, և մենք անհամբեր սպասում ենք շարունակել համատեղ աշխատել մեր երկկողմանի առաջնահերթությունների շուրջ, ներառյալ անվտանգության ոլորտում համագործակցությունը, տնտեսական գործընկերությունը և էներգետիկայի զարգացումը։
Միացյալ Նահանգները շարունակում է աջակցել Ադրբեջանի և Հայաստանի միջև երկարատև խաղաղությանը։ Հակամարտության խաղաղ կարգավորումը կնպաստի Հարավային Կովկասի բարգավաճմանը։ Հիմա ժամանակն է հանձնառու լինել խաղաղությանը և Հարավային Կովկասի ժողովուրդների համար բարգավաճման նոր դարաշրջան սկսել։
Մենք անհամբեր սպասում ենք մեր գործընկերության խորացմանը առաջիկա տարիներին և տասնամյակներում։
Լավագույն մաղթանքներով՝ Ձեզ և Ադրբեջանի ժողովրդին»։
