Իրաքը պատրաստակամություն է հայտնել 20-ական միլիոն դոլար նվիրաբերել Գազայի և Լիբանանի վերականգնմանը՝ Արաբական համատեղ հիմնադրամ ստեղծելու իր նախաձեռնության շրջանակում․ հիմնադրամը գումարներ կուղղի զինված հակամարտություններից տուժած արաբական պետությունների վերականգնմանը։ Այդ մասին հայտարարել է Իրաքի վարչապետ Մոհամմեդ Շիա Սուդանը՝ Բաղդադում ընթացող Արաբական լիգայի գագաթնաժողովի ժամանակ։
«Իրաքը 18 նախաձեռնություն է ներկայացրել քննարկման, այդ թվում՝ Արաբական հիմնադրամ ստեղծելու նախաձեռնությունը, որը կօգնի վերականգնել պատերազմներից ու հակամարտություններից տուժած արաբական երկրներին։ Մենք վերահաստատում ենք, որ Բաղդադը 20 միլիոն դոլար կհատկացնի այդ հիմնադրամին՝ Գազայի և ևս 20 միլիոն դոլար՝ Լիբանանի վերականգնման համար»,- ասել է Իրաքի վարչապետը, ում ելույթը հեռարձակել է Al-Ikhbariya հեռուստաընկերությունը։
Մոհամմեդ Շիա Սուդանը նաև հույս է հայտնել, որ գագաթնաժողովի մասնակիցները կյանքի կկոչեն այս նախաձեռնությունը, ինչը «շրջադարձային իրադարձություն կլինի և կապահովի արաբական երկրների ժողովուրդների արժանի ապագան»։
