Իսպանիայի իշխանությունները Բարսելոնայի տարածքում ապրող ավելի քան 160 հազար մարդկանց խնդրել են շաբաթ օրը տանը մնալ այն բանից հետո, երբ արդյունաբերական ձեռնարկությունում բռնկված հրդեհի պատճառով տարածքում քլորի թունավոր ամպ է գոյացել, հաղորդել է AFP-ն:
Բարսելոնայից հարավ գտնվող Վիլանովա ի լա Ժելտրու ծովափնյա քաղաքում բռնկված հրդեհը ընդգրկել է այն շենքը, որտեղ պահվում էին լողավազանների մաքրման միջոցները, հայտնել են տարածաշրջանային հրշեջ ծառայությունից։
«Եթե գտնվում եք տուժած տարածքում, մի լքեք ձեր տունը կամ աշխատավայրը»,- ասվում է քաղաքացիական պաշտպանության ծառայության սոցցանցերի հաղորդագրությունում։
Ռիսկի գոտին ընդգրկել է հինգ մունիցիպալիտետ Վիլանովա ի լա Ժելտրուից մինչեւ Կալաֆել գյուղ Տարագոնի մոտ։
«Տուժածներ չկան»,- հայտնել են հրշեջ ծառայությունից՝ ավելացնելով, որ դեպքի վայր են եկել մեծ թվով ստորաբաժանումներ, որոնք վերահսկում են կրակը։
Ծառայությունը հայտնել է, որ «վերահսկում է հրդեհի հետեւանքով գոյացած (գազի) սյունը՝ փոփոխությունների եւ թունավորության մակարդակը պարզելու համար»:
«Քլորը շատ դժվար է այրվում, բայց երբ դա տեղի է ունենում, այն շատ դժվար է հանգցնել»,- ասել է արդյունաբերական սեփականության տերը՝ Խորխե Վինուալես Ալոնսոն, տեղի Rac1 ռադիոկայանի հարցազրույցում։
Նրա խոսքով՝ հրդեհի պատճառը կարող էր լինել լիթիումի մարտկոցը։
