Աշխատանքի և սոցիալական հարցերի նորանշանակ նախարար Մանե Թանդիլյանը վերջերս Կուտակային կենսաթոշակային համակարգի պարտադիր բաղադրիչը մինչև 2019թ-ի հուլիսի 1-ը հետաձգելու առաջարկ էր ներկայացրել: Այսօր Ազգային ժողովում լրագրողների հետ զրույցում նախարարն ասաց, որ պատճառը օրենքը լրամշակելու ու քաղաքացիների կարծիքը հաշվի առնելու համար վերցված ժամանակն է: «Առաջարկում եմ հետաձգել ու վերանայել այն դրույթները, որոնք քաղաքացիների համար ընդունելի չեն»,-բացատրեց նա:
Նախարարը տեղեկացրեց՝ ստացել է բավականին առաջարկներ, որոնք խելամիտ ու ողջախոհ են, ու կարելի է դիտարկել: «Հանրային կարծիքը գիտեմ, ժամանակն անհրաժեշտ է դիտարկելու այլ առաջարկները, որոնցում ասվում է, թե ինչպես համակարգն ընդունելի դարձնել»:
Լրագրողների հարցին, թե խնդիրներ չեն լինի՝ հաշվի առնելով, որ համակարգն արդեն մի քանի տարի գործում է, նա պատասխանեց. «Խնդիրները լուծելի են, ու հենց դրա համար է քննարկում անհրաժեշտ, անհրաժեշտ է ներգրավել տարբեր մասնագետներ՝ լավագույն լուծումը գտնելու համար»:
Ինչ վերաբերում է աղքատության կրճատմանը, նախարարը նշեց, որ իրենց պետք չի դիտարկել միայն որպես աղքատության դեմ պայքարող նախարարություն, իսկ աղքատության տոկոսը կրճատելու համար պետք է զարգացնել տնտեսությունը:
00:00:00
