Հայաստանն ու Իրանը համագործակցություն են հաստատել «Գազ՝ էլեկտրաէներգիայի դիմաց» նախագծի շրջանակներում, և մենք մտածում ենք Հայաստանից էլեկտրաէներգիայի ներմուծման և այդ երկիր գազի արտահանման ծավալների մեծացման մասին։ Այս մասին ապրիլի 3-ին «Հայք-Իրան. հազարամյա հարևանություն» թեմայով միջազգային համաժողովի ժամանակ հայտարարեց Հայաստանում Իրանի արտակարգ և լիազոր դեսպան Մեհդի Սոբհանին՝ հավելելով. «Հայաստանին էներգետիկ ռեսուրսներ են պետք, և Իրանը կարող է բավարարել այդ կարիքները»:

Նրա խոսքով, Հայաստանի և Իրանի տնտեսությունները սերտորեն փոխկապակցված են և լրացնում են միմյանց. «Մենք կարող ենք էներգետիկ ռեսուրսներ տրամադրել, Հայաստանը կապել գլոբալ հարավի, Հնդկաստանի, Չաբահար նավահանգստի, Պարսից ծոցի հետ, օգնել կապ հաստատել Կենտրոնական Ասիայի, Իրաքի հետ, Հայաստանն իր հերթին կարող է Իրանը կապել հյուսիսի հետ, Սև ծովի հետ՝ հաշվի առնելով, որ այն գտնվում է Հյուսիս-Հարավ միջանցքի միջնամասում»,- ընդգծեց դեսպանը։

Նրա գնահատմամբ՝ Հայաստանը կարող է լուրջ դեր խաղալ ԵԱՏՄ շուկաներ Իրանի մուտքի գործում։ «Մենք Հայաստանը դիտարկում ենք ոչ միայն որպես 3 միլիոնանոց շուկա, այլև որպես ԵԱՏՄ 200 միլիոնանոց շուկա մուտք գործելու հարթակ»,- հավելեց նա։

Սոբհանին նշեց, որ Հայաստանում Իրանի նկատմամբ հասարակական կարծիքը շատ դրական է այլ երկրների նկատմամբ ունեցած կարծիքի համեմատ։

Դիվանագետը դա կապել է Հայաստանի հետ Իրանի հատուկ հարաբերությունների և երկու երկրների միջև սերտ կապերի հետ։

Նա հիշեցրել է, որ Իրանի հայ համայնքը մեծ դեր ունի երկրի տնտեսության և մշակույթի մեջ։