Նիկոլ Փաշինյանի sms–ով զբաղեցրած պաշտոնից ազատված Սասուն Խաչատրյանից հետո Հակակոռուպցիոն կոմիտեն տևական ժամանակ ղեկավար չուներ։ Կառույցի «կուռացիան» իրականացնում էր Արտակ Պողոսյանը, ով իրավապահ համակարգի հնաբնակներից է։ Մինչ նախկին ոստիկանին անդրադառնալը, նախ նշենք, որ միայն նախորդ ամսվա մարտի 20–ին կառավարության որոշմամբ Հակակոռուպցիոնը նոր ղեկավար ունեցավ։ Արթուր Նահապետյանը նշանակվեց այդ պաշտոնին, ով մինչ այդ ՔԿ նախագահի տեղակալի պաշտոնն էր զբաղեցնում։
Սակայն Irakanum.am–ի ունեցած հավաստի տեղեկություններով, ինչպես իրավապահ այդ կառույցի անղեկավար մնալու ժամանակ, այնպես էլ հիմա Արտակ Պողոսյանը, ով կոմիտեի ղեկավարի տեղակալն է, հայտարարում է, թե ինքն է կոմիտեում հարց լուծողը և Արթուր Նահապետյանը կպաշտոնավարի այնքան ժամանակ, քանի դեռ ինքն է այդպես ցանկանում։ Այլ կերպ ասաց, ըստ մեր աղբյուրների Պողոսյան Արտակը նեղ «կռուգում» վստահեցնում է, թե ինքն է Նահապետյանի «կնքահայրը», և որ իշխանական վերնախավում իր հետ են հաշվի նստում։ Հիմա այն մասին, թե ով է Արտակ Պողոսյանը։ Նա 2023 թվականին է նշանակվել կոմիտեի նախագահի տեղակալ։ Կառուպցիայի դեմ պայքարին միացած Արտակ Պողոսյանն աղմկահարույց միջադեպի կենտրոնում է եղել։ Նա հայտնի է ոստիկանության բաժնում լրագրողի նկատմամբ կիրառած բռնությամբ։
Հիշեցնենք՝ 2014 թվականի փետրվարի 12-ին Երևանի Մաշտոցի պողոտայում ՀԱԿ ակտիվիստների՝ մարտի 1-ի հանրահավաքի մասին իրազեկման ակցիան լուսաբանելիս, Անի Գևորգյանը բերման էր ենթարկվել ոստիկանության Կենտրոնի բաժին: Ոստիկաններն, Անի Գևորգյանի փոխանցմամբ, իր և ակցիայի մասնակիցների նկատմամբ բռնություն են կիրառել, խոչընդոտել մասնագիտական գործունեությունը: Անի Գևորգյանին բերման են ենթարկել ոստիկանության Կենտրոնի բաժին, որտեղ բաժնի պետ Արտակ Պողոսյանը ապտակել է լրագրողին: Լրագրողն այս միջադեպով դիմել էր ՄԻԵԴ, երբ ներպետական բոլոր դատական ատյաններով անցնելով՝ որևէ արդյունքի չէր հասել: Ստրասբուրգյան դատարանը 2021 թվականին ՀՀ կառավարությանը հարցեր էր ուղղել, Անի Գևորգյանն ասում է՝ այժմ սպասում են ՄԻԵԴ որոշմանը։ ՄԻԵԴ որոշումը մինչ այժմ չկա։
Մեկ այլ դրվագ էլ կա: Մասնավորապես մեկ այլ սկանդալի կենտրոնում է հայտնվել Արտակ Պողոսյանը՝ 2019 թվականին: Այդ ժամանակ ոստիկանությունը արագորեն փակեց թեման, իսկ Պողոսյանին՝ համակարգից հեռացնելը մեկնաբանեց ոստիկանությունում «սովորական» դարձած կադրային փոփոխություններով: Մինչդեռ իրականությունն այն էր, որ այդ ժամանակ փոխոստիկանապետ Պողոսյանը փորձել էր ծածկադմփոց անել Երևանի կենտրոնում գտնվող օբյեկտներից մեկում տեղի ունեցած միջադեպը, որը սակայն ՔՊ-ական Էդուարդ Աղաջանյանի բերանով հասնում է Նիկոլ Փաշինյանին, ով էլ ոստիկանապետին հրահանգում է հեռացնել Պողոսյանին զբաղեցրած պաշտոնից: Այս մասին առավել մանրամասն կներկայացնենք հաջորդիվ:
Ու դրանից Արտակ Պողոսյանին՝ երկու տարի անց իրավապահ համարագի մեկ այլ կառույցի կարևորագույն պաշտոնում նշանակելը, իրավամբ հարված է առանց այն էլ ցածր վստահություն ունեցող իրավապահ համակարգի հեղինակությանը։ Սակայն խնդիրն այստեղ նաև այն է, որ այդ անձը շարունակում է «տառապել» ավելորդ մեծամտությամբ, և որ ամենակարևորն է անպատժելիության «սինդրոմով», կամ գուցե իսկապես կոմիտեում թիվ մեկ հարց լուծողն է, որի հետ նորանշանակ ղեկավար Արթուր Նահապետյանը կամ պետք է համակերպվի, կամ գործուն քայլեր ձեռնարկի։ Երրորդ տարբերակ չկա։
Irakanum.am
