ՆԳ փոխնախարար Արմեն Ղազարյանն ընդունել է Եվրոպական արտաքին գործողությունների ծառայության դիվանագիտական ակադեմիայի դասախոս, Բուլղարիայի նախկին փոխվարչապետ, ԵՄ նախկին հանձնակատար Մեգլենա Կունևայի գլխավորած պատվիրակությանը։
Ներկայացնելով Ներքին գործերի նախարարության ձևավորման ընթացքը՝ Արմեն Ղազարյանը կարևորել է իրականացվող բարեփոխումները, դրանց արդյունավետությունը ինչպես Նախարարության, այնպես էլ ՆԳՆ մանդատի ներքո գտնվող ոլորտներում։ Փոխնախարարը ներկայացրել է նաև հանրային անվտանգության և հանրային ծառայությունների մատուցման ոլորտում կատարված փոփոխություններն ու ընթացիկ աշխատանքները։
Հանդիպման ընթացքում անդրադարձ է կատարվել ՀՀ-ԵՄ մուտքի արտոնագրերի ազատականացմանն ու այդ համատեքստում ընթացող քննարկումներին։ Արմեն Ղազարյանը ներկայացնելով կատարված աշխատանքները՝ անդրադարձել է արդեն իսկ մեկնարկած բանակցություններին, գործառնական փուլին և աշխատանքների համակարգմանը։ Նա նշել է, որ առաջիկա ամիսներին Եվրոպական հանձնաժողովը Հայաստանին կտարամդրի Գործողությունների ծրագիրը։
Մեգլենա Կունևան ներկայացրել է վիզաների ազատականացման՝ Բուլղարիայի փորձը՝ անդրադառնալով այդ համատեքստում կատարված աշխատանքներին և այն ինստիտուտներին, որոնք ձևավորվել են ի նպաստ վիզաների ազատականացման գործընթացների արդյունավետ համակարգման, կառավարման և իրականացման։ Նա ներկայացրել է նաև պետության համար մի շարք կարևոր ասպեկտներ և մուտքի արտոնագրերի ազատականացումից հետո գրանցված հաջողություններ։
Հանդիպմանը քննարկվել են նաև տեսական և գործնական բնույթի այլ հարցեր։
