Վաշինգտոնը պնդում է Ուկրաինայում առնվազն կարճաժամկետ հրադադարի մասին, քանի որ ռազմական գործողությունների շարունակությունը չի նպաստում բանակցային գործընթացին։ Այսպիսի դիրքորոշում է հայտնել ԱՄՆ պետքարտուղարության ղեկավար Մարկո Ռուբիոն ամերիկյան CBS հեռուստաալիքին տված հարցազրույցում։
ԱՄՆ ներկայիս արտաքին քաղաքականության մասին զրույցի ժամանակ հեռուստահաղորդավար Մարգարեթ Բրենանը հարցրել է Դոնալդ Թրամփի հատուկ բանագնաց Սթիվեն Վիտկովի՝ վերջերս Մոսկվա կատարած այցի մասին, որտեղ նա հանդիպել է Վլադիմիր Պուտինի հետ։ Հաղորդավարը նշել է, որ Ռուբիոն ավելի վաղ ասել էր, որ Վիտկոֆի Ռուսաստան այցի արդյունքները ցույց կտան՝ Մոսկվան գնո՞ւմ է հրադադարի, թե՞ ՌԴ նախագահը նախընտրում է հետաձգելու մարտավարությունը։ Սակայն Պուտինը ոչ մի հստակ քայլ չարեց խաղաղ բանակցությունների ուղղությամբ, իսկ Ռուբիոն ավելի ուշ բանակցություններ վարեց ՌԴ ԱԳ նախարար Սերգեյ Լավրովի հետ, և այդ բանակցությունների արդյունքում նույնպես հայտարարություններ չեղան, հայտնում է DW-ն։
Այս ֆոնին Բրենանը հարցրել է Ռուբիոյին, թե, կարծում է նա արդյոք, որ Մոսկվան նախընտրել է ձգձգել բանակցային գործընթացը: Ի պատասխան՝ ԱՄՆ պետքարտուղարը նշել է, որ չի քննարկելու Ռուսաստանի հետ բանակցային գործընթացը։ Նա ասել է, որ Վիտկոֆի հանդիպումը Պուտինի հետ «խոստումնալից» էր, սակայն «որոշ խնդիրներ կան»:
«Սա բարդ, եռամյա պատերազմ է, որը տարվում է շատ երկար ռազմաճակատում, շատ բարդություններով։ Ոչ ոք չի ասում, որ դա հեշտ է, բայց ես ուզում եմ, որ բոլորը հասկանան, թե որն է ծրագիրը: Ա պլանը պետք է դադարեցնել կրակոցները, որպեսզի մենք կարողանանք անցնել պլան Բ` երկրորդ փուլ, որը պետք է բոլորին մոտենա բանակցությունների սեղանին», - ասել է Ռուբիոն:
Միևնույն ժամանակ, ըստ Պետդեպարտամենտի ղեկավարի, Մոսկվայի և Կիևի միջև բանակցությունները պարտադիր չէ, որ ուղղակի լինեն, դրանք կարող են իրականացվել մաքոքային դիվանագիտության միջոցով։ Բայց ամեն դեպքում, «մենք չենք կարող նույնիսկ հասնել երկրորդ մասին, քանի դեռ չենք հաղթահարել առաջինը», - ասել է Ռուբիոն: «Դժվար է պայմանավորվել պատերազմի տեւական ավարտի շուրջ, երբ նրանք կրակում են միմյանց վրա, և այդ պատճառով նախագահը (Թրամփ-Խմբ.) ցանկանում է զինադադար», - հայտարարել է դիվանագետը։
