Ուկրաինական «Բատկիվշչինա» քաղաքական ուժերի առաջնորդներ Յուլիա Տիմոշենկոն և «Եվրոպական համերաշխություն» Պյոտր Պորոշենկոն արձագանքել են Թրամփի ներկայացուցիչների հետ գաղտնի բանակցությունների մասին հրապարակմանը։
«Ուկրաինան, և նախագահ Զելենսկին դա հստակ հայտարարել է, պատրաստ է բանակցել պատերազմի ավարտի շուրջ նախագահ Թրամփի ուժեղ ղեկավարության ներքո։
«Բատկիվշչինա»-ի թիմը բանակցություններ է վարում մեր բոլոր դաշնակիցների հետ, որոնք ի վիճակի են օգնել արագորեն ապահովել արդար խաղաղությունը։
Մինչև այդ պահը, և ես դրա մասին մեկ անգամ չէ, որ խոսել եմ, Ուկրաինայում որևէ ընտրությունների անցկացման մասին խոսք լինել չի կարող»,- գրել է Տիմոշենկոն։
Պորոշենկոն, իր հերթին, գրել է. «Մենք հրապարակավ և թափանցիկ աշխատում ենք մեր ամերիկացի գործընկերների հետ՝ Ուկրաինային երկկուսակցական աջակցությունը պահպանելու համար: Մենք բազմիցս առաջարկել ենք այդ հանդիպումները համակարգել իշխանությունների հետ՝ նույնիսկ հրավիրելով դեսպանին։ Մենք նաև բազմիցս և հրապարակայնորեն խոսել ենք կառավարության և ամերիկյան վարչակազմի միջև կապի բացակայության մասին, ինչը սպառնալիք է մեր պետության համար։
Ամերիկացի ներկայացուցիչների հետ մեր քննարկումների էությունը միշտ հիմնված է եղել երկու սկզբունքի վրա՝ առաջին հերթին անվտանգությունը և խաղաղությունը՝ ուժի միջոցով: Մասնավորապես, դա նշանակում է զենք, հետախուզություն, պատժամիջոցներ Ռուսաստանի դեմ, ֆինանսական աջակցություն, ժողովրդավարական կայունություն (ազատություն և ժողովրդավարություն) և անդրատլանտյան միասնություն։
Մեր թիմը միշտ էլ կտրականապես դեմ է եղել և հիմա էլ դեմ է պատերազմի ժամանակ ընտրությունների անցկացմանը։ Ի տարբերություն մեզ, կառավարությունը միջոցները շեղում է զինվորականներից՝ ձայներ գնելու համար և օգտագործում է հակասահմանադրական և արտադատական պատժամիջոցներ՝ քաղաքական հակառակորդներին վերացնելու համար, ինչը նշանակում է քաղաքական դրդապատճառներով հալածանքներ և նախընտրական արշավի սցենար:
Մենք ասել ենք և ասում ենք, որ ընտրությունները կարող են տեղի ունենալ միայն հրադադարից և Ուկրաինայի անվտանգության երաշխիքներով խաղաղ համաձայնագրի ստորագրումից հետո։ Այդ ժամանակ ռազմական դրությունը ակնհայտորեն կավարտվի։ Դրանից ոչ ուշ, քան 180 օր հետո պետք է անցկացվեն ազատ և ժողովրդավարական ընտրություններ՝ ապահովելու համար ժողովրդի կամքն ու ազատ աշխարհի վստահությունը։
Հիշեցնեմ, որ 2019 թվականին մեր թիմն ապահովեց արդար և ժողովրդավարական ընտրությունների անցկացումը, որոնցում հաղթեց Վլադիմիր Զելենսկին, այնուհետև նրա «Ժողովրդի ծառան» կուսակցությունը, որը մոնո մեծամասնություն կազմեց։
Դաշնակիցների հետ իմ շփումներում ես նաև պնդում եմ զենքի մատակարարումների ավելացումը, Ռուսաստանի դեմ ավելի ուժեղ պատժամիջոցները և հստակ կարմիր գծերը, որոնք չեն կարող անցնել խաղաղ բանակցություններում: Այսօրվա մեր հիմնական խնդիրն է պաշտպանել Ուկրաինայի շահերը և ապահովել նրա եվրոպական զարգացումը։ Դա յուրաքանչյուր ուկրաինացի քաղաքական գործչի պարտականությունն է՝ անկախ նրանից՝ նա իշխանություն է, թե ընդդիմություն»։
