ԱՄՆ նախագահ Դոնալդ Թրամփը ազգային անվտանգության ներկայացուցիչներին հանձնարարել է ուսումնասիրել Ուկրաինային զենքի մատակարարումը ժամանակավորապես կամ ամբողջությամբ դադարեցնելու հնարավորությունը։ Հանձնարարականը նա տվել է նախօրեին Սպիտակ տանը Ուկրաինայի նախագահ Վլադիմիր Զելենսկու հետ հանդիպումից հետո։ Այդ մասին հայտնել է The Wall Street Journal-ը՝ հղում անելով իր աղբյուրներին։
Պարբերականը նշել է, որ միևնույն ժամանակ Թրամփը հետևելու է Ուկրաինայի իշխանությունների հետագա քայլերին ու գործողություններին։
Ամերիկյան մեկ այլ պարբերական՝ The New York Times-ն էլ գրել է, որ Թրամփը կարող է դադարեցնել անգամ անուղղակի աջակցությունը Ուկրաինային՝ Զելենսկու հետ երեկ կայացած թեժ բանավեճից հետո։
Հիշեցնենք՝ երեկ Սպիտակ տանը կայացած հանդիպման ժամանակ ԱՄՆ նախագահ Դոնալդ Թրամփը հայտարարել է, որ կդադարի Ուկրաինային աջակցել, եթե Վլադիմիր Զելենսկին չհամաձայնի ընթանալ հակամարտությունը կարգավորելու ճանապարհով։
«Կամ դուք հակամարտությունը կարգավորելու գործարք կկնքեք կամ մենք ձեռքներս լվանում ենք»,- ասել է Թրամփը։
Թեժ բանավեճից հետո Զելենսկին լքել է Սիպտակ տունը, Թրամփն էլ հայտարարել է, որ նա պատրաստ չէ խաղաղության և Սպիտակ տուն կարող է վերադառնալ այն ժամանակ, երբ պատրաստ կլինի դրան։
«Զելենսկին անհարգալից վերաբերմունք դրսևորեց Ամերիկայի Միացյալ Նահանգների նկատմամբ՝ մեզ համար սրբազան Օվալաձև կաբինետում։ Նա կարող է Սպիտակ տուն վերադառնալ այն ժամանակ, երբ պատրաստ կլինի խաղաղության»,- հայտարարել է ԱՄՆ նախագահը։
