Ուկրաինական հակամարտության կարգավորման հարցով ԱՄՆ նախագահ Դոնալդ Թրամփի հատուկ բանագնաց Քիթ Քելլոգը Ուկրաինայում է։

Ուկրաինական  «Общественное» հեռուստաալիքն այսօր հրապարակել է Քելլոգի՝ Կիև ժամանելու կադրերը ու հաղորդել, որ նրան օդանավակայանում դիմավորել է Ուկրաինայում ԱՄՆ դեսպան Բրիջիթ Բրինքը։

Թրամփի բնագնացն Ուկրաինայում ասել է, որ ԱՄՆ քաջ գիտակցում է անվտանգության երաշխիքների տրամադրման անհրաժեշտությունը։

«Իմ առաքելության մի մասը լսելն է: Հետո ես կվերադառնամ ԱՄՆ և կխոսեմ նախագահ Թրամփի հետ՝ համոզվելու համար, որ մենք ամեն ինչ ճիշտ ենք հասկանում»,- ասել է Քելլոգը։

 Ավելի վաղ էլ Wall Street Journal-ը գրել էր, որ Թրամփն իր բանագնացին հանձնարարել է 100 օրվա ընթացքում հասնել նրան, որ պատերազմն ավարտվի։  

Bloօmberg գործակալությունն էլ կոնկրետ ժամկետ էր նշել․  հղում անելով իր դիվանագիտական աղբյուրներին՝  գրել էր, որ ամերիկյան կողմը ջանքեր է գործադրում պատերազմը մինչև ապրիլի  20-ն ավարտելու ուղղությամբ։