ՌԴ Պետդուման այսօր առաջին ընթերցմամբ ընդունել է օրինագիծ, որով առաջարկվում է ՌԴ քաղաքացիություն ձեռք բերելիս երդում տվող անձանց տարիքը 18-ից իջեցնել 14-ի։ Օրինագծի ընդունման նպատակ է հռչկվել հայրենասիրական ոգին բարձրացնելը, Ռուսաստանի Դաշնության Սահմանադրությանը և օրենսդրությանը հավատարիմ մնալու պարտավորությունը վաղ հասակից գիտակցորեն ստանձնելը։ Օրինագծով առաջարկվում է նաև անվավեր համարել Ռուսաստանի Դաշնության քաղաքացիություն տալու որոշումը, եթե անձը հրաժարվում է քաղաքացիություն ստանալիս երդում տալուց։
«Մենք պետք է հստակ ընդգծենք՝ նրանք, ովքեր Ռուսաստան են գալիս աշխատելու և ցանկանում են դառնալ ՌԴ քաղաքացի, պետք է հարգեն երկրի օրենքներն ու ամեն ինչ անեն՝ չվարկաբեկելու համար ՌԴ քաղաքացու բարձր կոչումը։ Եվ 14 տարեկանն այն տարիքն է, երբ դա արդեն հնարավոր է հասկանալ»,- օրենքի քննարկման ժամանակ ասել է Պետդումայի նախագահ Վյաչեսլավ Վոլոդինը։
Նա նշել է նաև, որ օրենքի տառին հավատարիմ մնալուց բացի, ՌԴ քաղաքացիություն ստացողները պետք է հարգեն նաև երկրի ավանդույթները, մշակույթը, պատմությունը։
