Եվրոպայի խորհրդի խորհրդարանական վեհաժողովի (ԵԽԽՎ) նախագահ Թեոդորոս Ռուսոպուլոսը պնդում է, որ Վեհաժողովից Վրաստանի դուրս գալը միայն վատթարացրել է իրավիճակը նրանց համար։ Այս մասին նա լրագրողներին ասել է Ստրասբուրգում՝ Վեհաժողովի ձմեռային նստաշրջանի ավարտից առաջ, հայտնում է «Европейская правда»-ն։
Թեոդորոս Ռուսոպուլոսը պնդում է, որ Վրաստանի իշխանությունների՝ ի պատասխան Վեհաժողովի առաջ քաշած պահանջների՝ ԵԽԽՎ-ի հետ համագործակցությունը դադարեցնելու որոշումը աննախադեպ է և խախտում է կազմակերպության սկզբունքները։ «Վեհաժողովը հաստատել է վրացական պատվիրակության լիազորությունները, ուստի նրանք պետք է աշխատեն ԵԽԽՎ-ում։ Սա Եվրախորհրդի անդամ երկրի իրավունք չէ, այլ պարտավորություն»,- ասել է նա։
Նախագահն ընդգծել է, որ Ստրասբուրգն արդեն զգուշացրել է Թբիլիսիին հնարավոր հետևանքների մասին։
«Մենք այդ մասին ազդանշաններ ենք ուղարկել վրացական պատվիրակությանը։ Առայժմ նրանց մի քանի շաբաթ ժամանակ ենք տալիս (իրենց դիրքորոշումը փոխելու համար): Բայց եթե փոփոխություններ չլինեն, ես լուծում կառաջարկեմ մինչև ապրիլ»,- պարզաբանել է նա։
Վեհաժողովի նախագահը նաև ակնարկել է, որ որոշումը կարող է չսահմանափակվել ԵԽԽՎ-ի կողմից նոր պատժամիջոցներով, այլ կարող է ներգրավել նաև կազմակերպության այլ կառույցներ։ «Ես չեմ կարող խոստանալ, թե ինչ կանի Նախարարների կոմիտեն (ի պատասխան դրան), բայց ամեն ինչ կանեմ, որպեսզի կանոնադրական մարմինների՝ ԵԽԽՎ-ի, Կառավարության ղեկավարի և գլխավոր քարտուղարի դիրքորոշումները համաչափ լինեն»,- ասել է նա։
Թեոդորոս Ռուսոպուլոսը նաև կասկած է հայտնել պաշտոնական Թբիլիսիի՝ ԵԽԽՎ-ին անդամակցության սկզբունքներին հավատարիմ լինելու վերաբերյալ։
«Վրաստանը համարու՞մ է, որ պարտավորություններ ունի: Հատկապես այն բանից հետո, երբ վարչապետ Կոբախիձեն հայտարարեց եվրաինտեգրման դադարեցման մասին, իսկ հիմա ասում է, որ Վրաստանին ԵԽԽՎ-ն պետք չէ՞»,- հռետորական հարց է հնչեցրել նա։
Վրացական պատվիրակության ղեկավարը ԵԽԽՎ-ում աշխատանքը դադարեցնելու որոշման մասին հայտարարել է Վրաստանի դեմ պատժամիջոցների մասին վեհաժողովի որոշման ընդունումից մեկ ժամ անց։
