ԵՄ-ն արդեն կասեցրել է Վրաստանի կառավարությանը հատկացվելիք 100 միլիոն եվրոյի օգնությունը և քննարկում է այդ միջոցներն այլ նպատակներով օգտագործելու հնարավորությունը, հայտարարել է ԵՄ ընդլայնման հարցերով հանձնակատար Մարտա Կոսը, գրում է aliq.ge-ն:
Մասնավորապես, նրա խոսքով, վերոնշյալ գումարից 8,5 մլն եվրոն արդեն վերանախագծվել է և կուղղվի քաղաքացիական հասարակության ամրապնդմանը. նույն նպատակով հատկացվել է նաև լրացուցիչ 7,5 մլն եվրո։
«Մենք պետք է ուժեղացնենք մեր արձագանքը «Վրացական երազանք»-ի կառավարության տարածած ապատեղեկատվությանը», հունվարի 14-ին Եվրախորհրդարանի արտաքին հարաբերությունների հանձնաժողովի նիստում ասել է Կոսը։
Նրա խոսքով, Վրաստանում տիրող իրավիճակը «հիշեցում է, որ Եվրամիությանն անդամակցելը հեշտ չէ, և հետընթացներ կարող են լինել և լինում են»:
«Ցավում եմ, որ կառավարությունը շարունակեց շարժվել ԵՄ ինտեգրման դեմ։ Եվրամիությանն ինտեգրվելու վրաց ժողովրդի ընտրությունը ներառված էր սահմանադրական պարտավորության մեջ: Նրանք ամեն գիշեր փողոց են դուրս գալիս, քանի որ ակնհայտորեն ցանկանում են եվրաինտեգրվել», — նշել է Կոսը։
Խաղաղ ցուցարարների, ընդդիմության ներկայացուցիչների, քաղաքացիական հասարակության կազմակերպությունների և լրագրողների նկատմամբ կառավարության գործողությունները նա «միանգամայն անընդունելի» է բնորոշել։
