Վրաստանի նախկին նախագահ Սալոմե Զուրաբիշվիլին հայտարարել է, որ գնալու է ԱՄՆ և մասնակցելու է նորընտիր նախագահ Դոնալդ Թրամփի երդմնակալության արարողությանը։
«Մենք մեկուսացումից դուրս գալու հնարավորություն ունենք։ Ես դեր ունեմ, և այն լիարժեք կատարում եմ։ Գրեթե ամեն օր կապի մեջ եմ մեր արտասահմանյան գործընկերների հետ։ Հաստատում եմ, որ գնում եմ նախագահ Թրամփի երդմնակալության արարողությանը, Վաշինգտոնում կլինեմ Ջո Ուիլսոնի հրավերով։ Դա կարևոր է, ես այնտեղ բարձր մակարդակի հանդիպումներ կունենամ»,- ճեպազրույցի ժամանակ հայտարարել է Զուրաբիշվիլին։
Դոնալդ Թրամփի երդմնակալությունը տեղի կունենա հունվարի 20-ին։
Զուրաբիշվիլին չի ճանաչում Վրաստանի ներկայիս իշխանությունների, այդ թվում՝ նախագահ Միխեիլ Կավելաշվիլիի լեգիտիմությունը․ Կավելաշվիլիի երդմնակալության արարողությունը տեղի է ունեցել դեկտեմբերի 29-ին։ Այսօր Զուրաբիշվիլին լրագրողներին ցույց է տվել Թբիլիսիում իր նոր գրասենյակը և հայտարարել, որ այնտեղից կշարունակի «կատարել նախագահի գործառույթները»։
