Այսօր երեկոյան Թբիլիսիի Ռուսթավելու պողոտայում վերսկսվել է բողոքի ցույցը, հայտնում է Ինտերֆաքսը-ը:
Նշվում է, որ այս պահին Վրաստանի խորհրդարանի շենքի մոտ կրկին հավաքվում են քաղաքացիներ, որոնք համաձայն չեն գործող իշխանությունների քաղաքականությանը:
Հավաքվածները պարզել են Վրաստանի և Եվրամիության դրոշները։ Խորհրդարանի շենքի հարակից փողոցներում ոստիկաններ են մոբիլիզացվել։
Վրաստանի նախագահ Սալոմե Զուրաբիշվիլին էլ Թբիլիսիի միջազգային գործընկերներին կոչ է արել անհապաղ արձագանքել ընդդիմադիր կուսակցությունների գրասենյակներում խուզարկություններին և ղեկավարների ու ակտիվիստների ձերբակալություններին։
Եվրոպամետ և հակակառավարական զանգվածային ցույցերը Թբիլիսիում և Վրաստանի այլ քաղաքներում սկսվել են նոյեմբերի 28-ին. այդ օրը պաշտոնապես հայտնի դարձավ, որ «Վրացական երազանք»-ը հրաժարվում է անդամակցել Եվրամիությանը։
Իրակլի Կոբախիձեի հայտարարությունից անմիջապես հետո հազարավոր քաղաքացիներ ինքնաբուխ հավաքվեցին և՛ Թբիլիսիում՝ խորհրդարանի շենքի մոտ, և՛ Վրաստանի տարբեր քաղաքներում՝ Բաթումիում, Զուգդիդիում, Քութաիսիում, Գորիում։
Կոբախիձեի հայտարարությանը հաջորդեց «Վրացական երազանք»-ի գրասենյակի մոտ ինքնաբուխ ակցիա, որը հետագայում վերածվեց բազմահազարանոց ցույցի և ցրվեց հատուկջոկատայինների ուժերով, իսկ նոյեմբերի 29-ի վաղ առավոտյան նրանք դաժանորեն հարձակվեցին Ռուսթավելիի պողոտայում մնացած սակավաթիվ ցուցարարների վրա։
Նախագահ Սալոմե Զուրաբիշվիլիի խոսքով՝ Վրաստանի ոչ լեգիտիմ իշխանությունը պատերազմ է հայտարարել սեփական ժողովրդին։ Ընդդիմության գնահատմամբ՝ կառավարությունը պաշտոնապես փոխել է երկրի արևմտյան ուղին։ ՀԿ-ները քաղաքացիներին կոչ են անում չհամակերպվել «Վրացական երազանք»-ի որոշմանը։
