Crocus City Hall համերգասրահում տեղի ունեցած ահաբեկչության զոհերը և զոհերի հարազատները խմբակային հայց են ներկայացրել Մոսկվայի Զամոսկվորեցկի շրջանային դատարան ընդդեմ «Ինգոսստրախ» ապահովագրական ընկերության, հայտնել է «Медуза»-ն՝ վկայակոչելով Մոսկվայի ընդհանուր իրավասության դատարանների մամուլի ծառայությանը։
«Հայցվորները դատարանին խնդրում են հաստատել ապահովագրական դեպքի առաջացման փաստը՝ Crocus International-ի և «Ինգոսստրախ» ԲԲԸ-ի միջև կնքված քաղաքացիական պատասխանատվության ապահովագրության պայմանագրով վճարումներ ստանալու համար»,- հայտնում է մամուլի ծառայությունը։ Նշվում է նաև, որ դատարանը հայցը վարույթ ընդունելու որոշում դեռ չի կայացրել։
Ինգոսստրախը ապահովագրել է Crocus-ի շենքը, որն ահաբեկչության ժամանակ գրեթե ամբողջությամբ ավերվել է։
Փորձագետների կարծիքով, ինչպես գրել են «Ведомости»-ն և «Forbes»-ը, ահաբեկչությունից համերգասրահին հասցված վնասը կազմել է 10-12 միլիարդ ռուբլի։ «Ինգոսստրախ»-ը մայիսին հայտնել էր, որ Crocus-ի վնասի պատճառով ապահովագրական պահանջի վերաբերյալ որոշում դեռևս չի ընդունվել:
