Սպիտակ տան ազգային անվտանգության հարցերով խորհրդական Ջեյք Սալիվանը շաբաթ օրը հայտարարել է, որ Ուկրաինայի վերաբերյալ Ռուսաստանի խաղաղության վերջին առաջարկը կհանգեցնի երկրի հետագա գերիշխանությանը և «միանգամայն անհեթեթ տեսլական է», հայտնում է Reuters-ը։ Նա նաև լրագրողներին ասել է, որ Չինաստանի բացակայությունն Ուկրաինայի խաղաղության գագաթնաժողովին, հավանաբար, Ռուսաստանի՝ չմասնակցելու խնդրանքի արդյունքն է:

Համաշխարհային առաջնորդները շաբաթ օրը հավաքվել էին շվեյցարական լեռնային հանգստավայրում, որպեսզի փորձեն աջակցություն ստանալ Ուկրաինայի խաղաղության առաջարկներին գագաթնաժողովում, որը բաց թողեց ԱՄՆ նախագահ Ջո Բայդենը, որից խուսափեց Չինաստանը, իսկ Մոսկվան անվանեց ժամանակի վատնում:

Ուկրաինական զորքերը պետք է ամբողջությամբ դուրս բերվեն ԴԺՀ-ի, ԼԺՀ-ի, Խերսոնի և Զապորոժիեի շրջաններից, այնուհետև Ռուսաստանի Դաշնությունը պատրաստ է սկսել բանակցությունները, ավելի վաղ հայտարարել էր ՌԴ նախագահ Վլադիմիր Պուտինը՝ ՌԴ ԱԳՆ ղեկավարության հետ հանդիպման ժամանակ։

Նրա խոսքով, հենց որ Ուկրաինան սկսի զորքերը դուրս բերել Դոնբասից և Նովոռոսիայից և պարտավորվի չանդամակցել ՆԱՏՕ-ին, Ռուսաստանի Դաշնությունը կդադարեցնի կրակը և պատրաստ կլինի բանակցությունների։