Ձեռքներս ծալած չենք, ՀՀ-ԵՄ նոր օրակարգի աշխատանքը բոլոր ուղղություններով է ընթանում. «Հայաստանի եվրաինտեգրման նոր հեռանկարները և մարտահրավերները» թեմայով հրավիրված խորհրդարանական լսումներին հայտարարեց Հայաստանում ԵՄ դեսպան Վասիլիս Մարագոսը։
«ԵՄ-ՀՀ կողմից բոլորն էլ համաձայն են, որ երբևիցե այսքան դինամիկ գործընթաց չի եղել՝ երկկողմ երկխոսության և հարաբերությունների առավել զարգացման համար»,-ասաց նա։
Դեսպանը ներկայացնելով ընթացիկ ծրագրերը՝ նշեց, որ կարևոր աշխատանք են իրականացնում նաև Սյունիքում։
«Մեր անդամ պետությունների հետ 120 մլն եվրոյից ավելի գումար ենք մոբլիզացրել Սյունիքում 35-ից ավելի նախագծերի համար»,-ասաց նա։
«ՀՀ-ում շատերը կենտրոնացած են անվտանգային խնդիրների շուրջ։ ԵՄ-ն շարունակում է հանձնառու մնալ տարածաշրջանում իրավիճակի կայունության և կարգավորման հարցին՝ ներառյալ այն հանդիպումները, որոնք կազմակերպվել է Եվրախորհրդի կողմից, և մենք կցանկանանք, որ այս գործընթացը վերադառնա նորմալ հուն»,-ավելացրեց դեսպանը։
