Ադրբեջանի ԱԳՆ-ն դժգոհել է Հայաստան և Ադրբեջան կատարած այցի արդյունքներով Եվրոպայի խորհրդի Մարդու իրավունքների հանձնակատարի զեկույցից:
«Ցավալի է, որ զեկույցը վկայակոչում է Լաչինի ճանապարհի, այսպես կոչված, շրջափակումը, որը հեռու է իրականությունից և չի ճանաչվել միջազգային դատարանի (ICJ) կողմից»,- ասվում է հաղորդագրությունում:
Ադրբեջանական կողմը կրկին պնդել է, թե ապացույցներ է ներկայացրել վերջին երեք տարիների ընթացքում Հայաստանի կողմից Լաչինի ճանապարհի իբրև համակարգված չարաշահման վերաբերյալ, որը խախտել է 2020 թվականի նոյեմբերի 10-ի եռակողմ հայտարարությունը և միջազգային իրավունքը:
«Ի վերջո, կարևոր է նշել, որ Ադրբեջանը հանձնակատարին հրավեր է ուղարկել տարածաշրջան այցելելու՝ ակնկալելով, որ նա դիտողություններ կանի՝ հիմնված չեզոքության, անկողմնակալության, հավասարության և մարդու բոլոր իրավունքների համընդհանրության վրա: Նշելով այցի արդյունքները՝ Ադրբեջանն ընդգծում է, որ հանձնակատարի դիտարկումներին պակասում է լիակատար արդարությունն ու անաչառությունը»,- ասվում է Ադրբեջանի ԱԳՆ հայտարարության մեջ:
