Հայաստանի և Ադրբեջանի միջև խաղաղության պայմանագիրը դեռ պատրաստ չէ ստորագրման, վերջնական նախագիծ չկա, բայց հույս կա պայմանագրի տեքստը վերջնականացնել հունվարին կայանալիք արտգործնախարարների հանդիպմանը։ Այդ մասին Հանրային Հ/Ը-ի «Հարցազրույցում» ասել է Հատուկ հանձնարարություններով դեսպան Էդմոն Մարուքյանը։
Ադրբեջանական գերությունից 32 զինծառայողների վերադարձը Մարուքյանը որակել է որպես Հայաստանի և Ադրբեջանի միջև վստահության մթնոլորտի ամրապնդման քայլ:
Դեսպանը նաև մեկնաբանել է այն հայտարարությունը, թե Ադրբեջանը չի կատարում իր ստանձնած պարտավորությունները՝ նշելով, որ 2020 թվականի նոյեմբերի 9-ի եռակողմ հայտարարության մեջ նշված բոլոր պայմաններն այլևս գործող չեն․
«Սխալ տպավորություն կա, որ եթե բանակցություններն ընթանում են ԱՄՆ-ում, Բրյուսելում կամ Մոսկվայում, ապա նրանք երաշխավորն են, բայց դա այդպես չէ։ Երաշխավորի մեխանիզմը պետք է փաստաթղթավորված լինի, դրանում պետք է նշվեն բոլոր պայմանները կողմերի միջև վեճի առաջացման դեպքում», - նշել է Մարուքյանը։
