Գյումրու ավագանու անդամ Կարեն Մալխասյանը ֆեյսբուքի իր էջում գրել է. 

Առաջին նկարում Լենինականի Կոմերիտմության այգին և «Ավետաբեր» արձանն են։

Երկրորդ նկարում (մեր օրեր)՝ այն, ինչ մնացել է այգուց և արձանից։  

Օրերս առաջարկություն եմ ներկայացրել Գյումրի համայնքի ղեկավարին շահագրգիռ կողմերի հետ համագործակցության արդյունքում գտնել՝ Վ․ Սարգսյան փողոցում «Երիտասարդության այգու» (նախկին Կոմերիտմիության այգի) և այգում գտնվող «Ավետաբեր» արձանի վերակառուցման, վերականգնման և պահպանման լուծման ուղիները՝ հայտնելով նաև իմ պատրաստակամությունը ցանկացած ձևաչափով ներգրավվելու վերը նշված խնդիրների լուծման աշխատանքներին։

Հարցով հետաքրքրված անձանց հիշեցնեմ, որ այգին, որպես կանաչ գոտի, գործել է մինչև 1988 թվականի աղետալի երկրաշարժը, այնուհետև տարածքում տեղադրվել են տնակներ, և այգին դարձել է տնակային ավան։ Տարիների ընթացքում բնակարան ստացած ընտանիքները լքել են տարածքը։ 

Այգում 1981 թվականին տեղադրվել է «Ավետաբեր» արձանը, որի հեղինակներն են ՀՀ վաստակավոր գործիչ, նկարիչ, քանդակագործ Սամվել Պետրոսյանը և ՀԽՍՀ վաստակավոր ճարտարապետ Ռաֆայել Եղոյանը։ «Ավետաբերը» երիտասարդության, ուժի, գեղեցկության արձան է, որը մարմնավորել է ջահելության իղձերն ու երազանքները։

 Ներկայումս նշված տարածքում առկա են մի քանի տնակներ և տաղավար։ Հայտնի է նաև, որ այգու որոշակի հատված ժամանակին օտարվել է մասնավորին, որի արդյունքում, օտարված հատվածը կառուցապատվել է և գործում է որպես առևտրի կենտրոն։