«Գրեթե երկուսուկես տարի Ադրբեջանը վերականգնում է 10 հազար քառակուսի կիլոմետր հսկայական տարածք, որն ամբողջությամբ ավերված է»:
Այս մասին «Աշխարհն այսօր. մարտահրավերներ և հույսեր» թեմայով 10-րդ Գլոբալ համաժողովի բացման արարողության ժամանակ Բաքվում ասել է Ադրբեջանի նախագահ Իլհամ Ալիևը։
Նա նշել է, որ Ադրբեջանը ոչ պատերազմական հանցագործություններ ու ավերածություններ է կատարել, ոչ էլ ցեղասպանություն է իրականացրել, այլ «ընդամենը ռազմի դաշտում վրեժ է լուծել»:
Ըստ Ալիևի՝ պատերազմի ավարտից անմիջապես հետո Ադրբեջանը հանդես է եկել խաղաղ բանակցություններ սկսելու նախաձեռնությամբ և ներկայացրել հինգ սկզբունքներ, որոնք կարող են հիմք հանդիսանալ Հայաստանի հետ խաղաղության համաձայնագրի կնքման համար: «Մենք հուսով ենք, որ միջազգային դերակատարները, նրանց ներդրումն այս հարցում կհամոզի Հայաստանին բաց չթողնել այս հնարավորությունը»,- հավելել է նա՝ նշելով, թե «Ադրբեջանը խաղաղություն է ուզում»:
«Ադրբեջանի և Հայաստանի միջև խաղաղության հասնելու համար որևէ խոչընդոտ չկա», ընդգծել է Ադրբեջանի նախագահը՝ կրկնելով վաղուց շրջանառող իր թեզն այն մասին, թե Ղարաբաղում հայերը կարող են ապրել ադրբեջանական օրենքներով՝ որպես ազգային փոքրամասնություններ:
«Վստահ եմ, որ Ղարաբաղի տարածաշրջանում ապրող հայերի կյանքը շատ ավելի լավ է լինելու այդ դեպքում։ Յուրաքանչյուր հակամարտություն ունի իր պատմությունը, իր դինամիկան և իր ավարտը: Բայց կարևորն այն է, որ երկրների միջեւ վեճերը լուծվում են միջազգային իրավունքի հիման վրա, տարածքային ամբողջականությունն ու ինքնիշխանությունը չեն կարող ուժով փոխվել»։
