Այսօր Արցախի հարցի լուծման մեկ տարբերակ կա՝ անկախ ու ինքնորոշված Արցախ։ Այս մասին հայտարարել է Հայ առաքելական եկեղեցու Արցախի թեմի առաջնորդ Վրթանես եպիսկոպոս Աբրահամյանը՝ Ստեփանակերտի Վերածննդի հրապարակում, որտեղ հավաքվել են արցախցիները եւ վանկարկել «Արցախ»։
«Դուք հավաքվել եք Ստեփանակերտի հրապարակում՝ Արցախի անկախության համար պայքարած ձեր նախնիների կոչով։ Խոնարհվում եմ ձեր առջեւ, մենք մեծ գին ենք վճարել ազատ եւ ինքնորոշված Արցախում ապրելու հնարավորության համար։ Այսօրվա մեր խորհրդանշական հանդիպումը վառ ապացույցն է այն բանի, որ Արցախյան շարժումը ավարտված չէ եւ շարունակվում է, քանի որ մենք կենդանի ազգ ենք եւ, չնայած տեսանելի ու անտեսանելի թշնամիներին, Արցախը պետք է ապրի ու բարգավաճի։ 1988-ի շարժման ժամանակ ասված «այո»-ն մնում է եւ չի կորցնում իր արդիականությունն այսօր։ Որպեսզի այս «այո»-ն այսօր համախմբող դառնա, այն պետք է դառնա սրտից բխող ճիչ եւ շատերին դուրս բերի անտարբերությունից ու վերադարձնի մարդկանց դեպի արդար ճանապարհ:
Վստահեցնում ենք, որ հայությունը՝ Հայաստանում եւ ամբողջ աշխարհում, սպասում է արցախցիների որոշմանը։ Ժողովուրդը օրենսդիր ղեկավարության հետ միասին որոշում-հայտարարություն է արել. մենք պետք է վանենք բոլոր խոչընդոտները, որոնք խանգարում են մեր միասնականությանը եւ պայքարին։ Մենք պետք է համախմբվենք եւ շարունակենք մեր արդար պայքարը հանուն Արցախի: Մենք կանգնած ենք լինել-չլինելու հարցի առաջ, մեր արժանապատվության հարցի, մենք կյանքի ու մահվան արանքում ենք, եւ նրանք փորձում են որոշել մեր կյանքի իրավունքը՝ առանց մեզ, մութ ուժերը փորձում են Արցախը թողնել առանց հայերի եւ մեր օգտին հակառակ որոշումներ կայացնել։ Բայց մենք գիտենք, որ Արցախի հարցը պարզ հարց չէ, դա լույսի ու խավարի, չարի ու բարու պատերազմ է, քոչվորների ու բնիկ բնակչության խնդիրն է, եւ նրանք ուզում են այս հարցը լուծել գաղտնի՝ առանց մեր մասնակցության։
Այսօր Արցախի հարցի լուծման մեկ տարբերակ կա՝ անկախ ու ինքնորոշված Արցախ։ Սա է Արցախի հարցի լուծման բանալին՝ ժողովրդի ինքնորոշման իրավունքը, որին մենք հավատարիմ ենք եղել վերջին 30 տարիներին։ Հայ առաքելական եկեղեցին կանգնած է արցախցիների կողքին»,- նշել է Արցախի թեմի առաջնորդը։
