Ուկրաինայում պատերազմի եւ էներգետիկ ճգնաժամի ֆոնին Ֆրանսիայի եւ Գերմանիայի լարված հարաբերությունները «վերբեռնման» կարիք ունեն՝ ԵՄ երկու խոշորագույն երկրների միջեւ ավելի ամուր դաշինք ստեղծելու համար, հայտարարել է Ֆրանսիայի ֆինանսների նախարար Բրունո Լե Մերը, հայտնում է Reuters-ը։
Երկու երկրների միջեւ կապերը, որոնք ավանդաբար ԵՄ ավելի լայն քաղաքական նախաձեռնությունների շարժիչ ուժն են, վատթարացել են այն բանից հետո, երբ երկու կառավարությունները հետաձգել են հաջորդ շաբաթ նախատեսված հանդիպումը մինչեւ հունվար:
Լե Մերը, որը վարժ խոսում է գերմաներեն Գերմանիայում երկարամյա քաղաքական շփումների արդյունքում, ասել է, որ հարաբերություններն այժմ «բարդ են», նախ այն պատճառով, որ Ուկրաինայի պատերազմը դրդել է Բեռլինին շրջվել դեպի Վաշինգտոն, մինչդեռ Փարիզը պաշտպանում է «եվրոպական ինքնիշխանությունը»:
Իսկ Ռուսաստանից գազի մատակարարումների դադարեցումը բացահայտել է Գերմանիայի կախվածությունը եւ կասկածի տակ դրել նրա էներգետիկ մոդելը, մինչդեռ Ֆրանսիան նոր բեկում է կատարում միջուկային էներգիայի զարգացման գործում, ասել է Լե Մերը:
Վերջապես Գերմանիան ամբողջ ուժով փորձում է հաղթահարել Չինաստանի նոր, ավելի բարդ բիզնես միջավայրը, որը երկար ժամանակ «էլդորադո» է եղել գերմանական արդյունաբերության համար, նշել է նա:
Ֆրանսիացի պաշտոնյաները հիասթափություն են հայտնել Գերմանիայի միակողմանի որոշումների, այդ թվում՝ 200 միլիարդ եվրո արժողությամբ էներգետիկ փաթեթի կապակցությամբ, որը Բեռլինը ներկայացրել է առանց Փարիզին նախազգուշացնելու:
Իր հերթին, Ֆրանսիան նյարդայնացրել է գերմանացի պաշտոնյաներին՝ դեմ արտահայտվելով Պիրենեյներով նոր գազամուղ կառուցելու Գերմանիայի եւ Իսպանիայի առաջարկին, որը կփոխարինի Ռուսաստանից նվազող մատակարարումները՝ փոխարենը նախընտրելով էներգետիկ ներդրումները կենտրոնացնել Ֆրանսիայի միջուկային հատվածում:
Սպառազինության համակարգերը ԱՄՆ-ում, ոչ թե Եվրոպայում ձեռք բերելու Գերմանիայի որոշումը տարակուսանք է առաջացրել Ֆրանսիայում:
