«Միացյալ Հայաստան» Կուսակցության նախագահ Երվանդ Թարվերդյանը հանդես է եկել հայտարարությամբ, որը ներկայացնում ենք ստորև.
«Ադրբեջանական հերթական վայրագ էսկալացիան անվիճելի ապացույցն է այն բանի, որ Ադրբեջանին արդի աշխարհաքաղաքական մեծ հակամարտության գլխավոր շահառուների կողմից պարտադրվում է ռազմական ագրեսիա ընդդեմ Հայաստանի Հանրապետության:
Հիշենք, որ ուկրաինական Ռադան մեկ անգամ չէ, որ Ադրբեջանից ուղղակի պահանջել է սկսել գործողություններ Ռուսաստանի դեմ․ «Հաջորդը լինելու եք դուք փաստարկով»:
«Միացյալ Հայաստան» կուսակցությունը, ինչպես 44-օրյա պատերազմի կապակցությամբ, այնպես էլ այսօր համոզված է, որ կոնսոլիդացված արևմուտքի գլխավոր թիրախը Ռուսաստանի Դաշնությունն է: Պատահական չէ, որ ադրբեջանական ագրեսիան այսքան ճշգրիտ համընկավ ուկրաինական ռազմաճակատում ռուսական զինուժի կրած ժամանակավոր անհաջողությունների հետ:
Չնայած, որ կոնսուլիդացված արևմուտքը տարբեր անատամ հայտարարությունների տեսքով փորձում է դատապարտել Ադրբեջանին, սակայն, ինչպես նախկինում, այդպես էլ այսօր ոչ մի գործնական քայլ նկատելի չէ:
Արևմտյան մեր գործընկերներին առաջարկում ենք քննարկել Ադրբեջանի նկատմամբ պատժամիջոցի կիրառման հնարավորությունը:
Մեր կարծիքով ստեղծված իրավիճակում միայն հայկական ազգային մոբիլիզացիան է, որը անանցանելի պատվար կդնի օտար վայրագ զավթիչների դեմ, այլապես հերթական ագրեսիայի խաղաղ հանգուցալուծման ավարտից հետո ստիպված կլինենք փնտրել դավաճաններ, թույլեր և անպիտաններ:
Անհրաժեշտ ենք համարում անհապաղ քննարկումներ սկսել Իրանի Իսլամական Հանրապետության հետ՝ ռազմական օգնություն ցուցաբերելու հարցով: Ինչպես նաև ռազմական էլ ավելի սերտ համագործակցության շրջանակներ քննարկել Չինաստանի Ժողովրդական Հանրապետության և Հնդկաստանի հետ»:
