Արցախում վերջին օրերին իրավիճակը համեմատաբար հանգիստ է: Այս մասին «Փաստինֆո»-ին հայտնել է Արցախի ՄԻՊ Գեղամ Ստեփանյանը:
Նրա հաղորդմամբ՝ սահմանին լարվածությունը տարբեր ուղղություններով պահպանվում է, բայց իրավիճակը, ընդհանուր առմամբ, հանգիստ է.
«Նոր երթուղու և ընդհանուր իրավիճակը կայունացնելու հարցում պայմանավորվածություններ են ձեռք բերվել ռուս խաղաղապահների և ադրբեջանցիների միջև, դրանով է պայմանավորված, որ երեկ ու այսօր իրավիճակն Արցախում համեմատաբար կայուն է»,-ասաց Գեղամ Ստեփանյանը:
Ինչպես հայտնի է՝ Բերձորի եւ Աղավնոյի բնակիչներին մինչեւ օգոստոսի 25-ը տրվել է ժամանակ բնակավայրերից դուրս գալու համար:
Գեղամ Ստեփանյանը մեզ հետ զրույցում հայտնեց, որ Բերձորի և Աղավնոյի բնակիչների տարհանման աշխատանքները սկսվել են:
Իսկ թե՝ որտե՞ղ են վերաբնակեցվելու տեղահանված բնակիչները, Արցախի ՄԻՊ-ը մանրամասնեց.
«Աղավնոյի և Բերձորի բնակչությունը տեղահանվածների կարգավիճակ ունի դեռևս 2020թ-ի նոյեմբերի 9-ից հետո, իրենք օգտվելու են բոլոր այն ծրագրերից, որոնք գործարկված են տեղահանվածների համար: Ինչպես ԱՀ ՏԿԵ նախարարն է հաղորդել՝ ով ցանկություն կհայտնի վերաբնակվել Արցախում, կապրի Արցախում, ով ցանկություն կհայտնի տեղափոխվել ՀՀ-ն, կտեղափոխվի այնտեղ»,-ասաց Գեղամ Ստեփանյանը:
