«Թուֆենկյան» բարեգործական հիմնադրամը Արցախի Հանրապետության Մարտունու շրջանի Սոս համայնքում վերակառուցել է 2020 թվականի 44-օրյա պատերազմի ընթացքում վիրավորված Հարութ Հենրիկյանի բնակարանը:
Հարութը պատմել է, որ պատերազմի առաջին իսկ օրերից զինվորագրվել է աշխարհազորին և մեկնել ՊԲ պաշտպանական շրջան՝ մասնակցելու հայրենիքի պաշտպանությանը: Սակայն, լսելով, որ թշնամին պատրաստվում է հարձակվել և գրավել հայրենի Սոսը, անմիջապես վերադարձել է պաշտպանելու իր ծննդավայրը: Հոկտեմբերի 29-ի գիշերն անօդաչու թռչող սարքի հարվածից վիրավորում է ստացել՝ ոտքերի շրջանում: Վիրավորվելուց հետո Հարութն արդեն շուրջ տասը վիրահատություն է տարել, որոնք մինչ օրս շարունակվում են:
«Տան պայմաններն այնքան էլ հարմարավետ չէին: Այժմ բարելավվել են՝ շնորհիվ «Թուֆենկյան» բարեգործական հիմնադրամի»,-ասել է Հարութը՝ շնորհակալություն հայտնելով հիմնադրամին աջակցության համար:
Պատերազմից հետո, Հենրիկյանների տանը երկար սպասված իրադարձություն տեղի ունեցավ՝ Հարութն ընտանիք կազմեց, և այսօր նորաստեղծ ընտանիքը նոր բնակիչ ունի՝ փոքրիկ Մարկը, ով ծնողների ու հարազատների մխիթարությունն է այս ծանր օրերին:
