ՀՀ-ում ՌԴ դեսպան Սերգեյ Կոպիրկինն այսօր Երևանում «Հաղթանակի պարտեզի» բացման ժամանակ ասել է, որ ռուս խաղաղապահներն ամեն ինչ անում են Լեռնային Ղարաբաղում խաղաղությունը պահպանելու համար, փոխանցում է Sputnik Արմենիա լրատվական կայքը:
«Խաղաղապահներն ամեն ինչ անում են տարածաշրջանում կայունությունը պահպանելու, իրավիճակի սրում թույլ չտալու համար: Բոլորը, Հայաստանի ղեկավարությունը գիտակցում են, որ խաղաղապահներն առանցքային դեր ունեն տարածաշրջանում անվտանգությունը պահպանելու համար։ Ոչ ոք դա կասկածի տակ չի դնում»,- լրագրողներին ասել է դեսպանը:
Դեսպանը ձեռնպահ է մնացել Արցախի Փառուխ գյուղում տիրող իրավիճակի վերաբերյալ մեկնաբանություններից՝ հավելելով, որ Ռուսաստանի պաշտոնական դիրքորոշումը հայտնել են արտգործնախարար Սերգեյ Լավրովը և ԱԳՆ մամուլի խոսնակ Մարիա Զախարովան։
«Չեմ կարծում, որ դրան ավելացնելու բան կա: Մեր դիրքորոշման հիմքում, իհարկե, այն է, որ եռակողմ համաձայնագրերում ամրագրված դրույթները խստորեն կատարվեն»,-ասել է դեսպանը։
Խաղաղապահների կոնտինգենտի ավելացման հնարավորության մասին հարցին նա պատասխանել է, որ դրա թիվը որոշվել է նշված եռակողմ համաձայնագրերով։
