Վարդենիսի համայնքապետի աշխատասենյակի բանալին եւ կնիքն անհետացել են։ Երեկ մեր թիմակիցները գնացել էին համայնքապետարան, որ վերցնեն համայնքապետի սենյակի բանալին, սակայն աշխատասենյակի դուռը փակ է եղել։ Չկան՝ ո՛չ բանալին, ո՛չ կնիքը․ Yerkir.am-ի հետ զրույցում հայտնել է Վարդենիս խոշորացված համայնքի ավագանու անդամ, «Միասնական Վարդենիս» դաշինքի անդամ Դավիթ Շահնազարյանը։

«Փաստն այն է, որ Վարդենիսի նախկին ղեկավարությունը խոչընդոտում է ոչ միայն ընտրված համայնքապետ Ահարոն Խաչատրյանի մուտքն իր աշխատավայր, այլեւ ընտրված ավագանու գործունեությանը: Խնդիրն այն է, որ խոշորացված Վարդենիսի կազմում գտնվող բոլոր այն գյուղերը, որոնցում պետք է տեղի ունենար հաստիքների փոփոխություն, նոր աշխատակազմի ձեւավորում՝ այդ գործընթացն էլ չի կատարվում։ Տապալվել է ամբողջ Վարդենիս խոշորացված համայնքի կառավարումը։ Իսկական քաոս է։ Մենք չգիտենք, թե, օրինակ, Գեղամասարի կամ Ծովակի համայնքապետի լիազորությունները դադարեցվա՞ծ են, թե՞ ոչ»,- ասել է Շահնազարյանը։

Նա նշեց, որ Վարդենիսի համայնքապետի աշխատասենյակի բանալու եւ կնիքի անհետացման առնչությամբ գրավոր դիմել են համայնքապետարանի աշխատակազմի ղեկավարին՝ որպես պաշտոնատար անձի, եւ պահանջել՝ հանձնման եւ ընդունման ակտերով տրամադրել կնիքը, աշխատասենյակի բանալիները:

«Մինչեւ այս պահը մենք դեռ չգիտենք, թե ում մոտ են համայնքապետի աշխատասենյակի բանալին եւ կնիքը: Մենք չգիտենք, թե ինչ գործողություններ կարող են արվել այդ կնիքով»,- ասել է Շահնազարյանը։

Անդրադառնալով սահմանային լարվածությանը, Գեղարքունիքի մարզում թշնամու կողմից արձակված անկանոն կրակին, որի հետեւանքով երեք զոհ ունեցանք, Շահնազարյանն ասաց, որ այս դեպքերից հետո նորընտիր համայնքապետ Ահարոն Խաչատրյանի հետ այցելել են սահմանամերձ գյուղեր, տեղում ծանոթացել իրավիճակին, շփվել սահմանամերձ գյուղերի բնակիչների հետ։

 

«Այս դեպքերից հետո աշխատանքային առաջին այցն ենք կատարել սահման՝ Նորաբակ եւ Կութ գյուղեր՝ հանդիպելու սահմանամերձ գյուղերում ապրող մեր հայրենակիցների հետ»,- նշել է նա։