Երևանի ավագանու «Իմ քայլը» խմբակցությունում հնչել են կարծիքներ, որ այն անդամները, որոնք չեն պաշտպանում Երևանի քաղաքապետ Հայկ Մարությանին անվստահություն հայտնելու քաղաքական որոշումը, վայր դնեն մանդատը։
«Փաստինֆո»-ի հետ զրույցի ժամանակ ավագանու «Իմ քայլը» խմբակցության ղեկավար Արմեն Գալջյանն ասաց, որ խմբակցության անդամների, այդ թվում նաև իր կողմից հնչել է կարծիք, որ ճիշտ են համարում՝ քաղաքական որոշումը չպաշտպանելու պարագայում վայր դնեն մանդատը և իրենց փոխարեն գան այլ թեկնածուներ, որոնք կպաշտպանեն որոշումը։
«Որևէ պահանջ կամ այլ բան տեղի չի ունեցել։ Խմբակցության անդամների կողմից կարծիքներ են եղել»,-նշեց Արմեն Գալջյանը։
«Փաստինֆո»-ն տեղեկացրել է, որ դեկտեմբերի 22-ին տեղի է ունենալու Երեւանի ավագանու արտահերթ նիստ` Հայկ Մարությանին անվստահություն հայտնելու օրակարգով: Նման նախաձեռնությամբ հանդես է եկել ավագանու «Իմ քայլը» խմբակցությունը, սակայն պարզվում է, որ ոչ բոլոր իմքայլականներն են համամիտ այս որոշմանն ու ոմանք հայտարարել են մանդատից հրաժարվելու, ոմանք էլ մանդատից հրաժարվելու պատրաստակամության մասին:
Փաստինֆո»-ի հարցին՝ ՀՀ վարչապետ Նիկոլ Փաշինյանի հետ հանդիպման ժամանակ և մասնավորապես Նիկոլ Փաշինյանի կողմից մանդատները վայր դնելու կարծիք հնչե՞լ է, Արմեն Գալջյանն ասաց, որ հանդիպման ժամանակ կարծիք հնչել է, բայց ոչ Նիկոլ Փաշինյանի կողմից։ Այդպիսով հաստատելով, որ Փաշինյանի քաղաքական որոշմանն ընդդիմացած իմքայլականների հարցը քննարկվել է նաեւ ՔՊ գրասենյակում Նիկոլ Փաշինյանի հետ հանդիպման ժամանակ:
Դիտարկմանը, որ ստացվում է՝ խմբակցությունում այս հարցի շուրջ տարաձայնություն կա, Արմեն Գալջյանը նկատեց՝ հրապարակային դաշտում էլ է դա երևում։ Կան խմբակցության մի քանի անդամներ, որոնք չեն կիսում այդ մոտեցումը։
Արմեն Գալջյանը նաև հայտնեց, որ քաղաքապետի պաշտոնում Հրաչյա Սարգսյանի թեկնածությունից բացի որևէ այլ մեկի թեկնածությունը չի քննարկվում։
Հիշեցնենք, որ Երևանի ավագանու «Իմ քայլը» խմբակցությունը քաղաքապետ Հայկ Մարությանին անվստահություն հայտնելու գործընթաց է մեկնարկել։ Ըստ մամուլում շրջանառվող լուրերի՝ անվստահություն հայտնելու նախագծին միացել է ավագանու 43 անդամ, սակայն արդենմի քանիսը հայատարել են, որ չեն միանալու անվստահություն հայտնելու գործընթացին:
00:00:00
