«Flyone Armenia» ավիաընկերության Երևան-Մոսկվա անդրանիկ չվերթն այսօր չեղարկվել է։ «Փաստինֆո»-ի հետ զրույցի ժամանակ «Զվարթնոց» օդանավակայանի հասարակայնության հետ կապերի բաժնի պատասխանատու Սաթենիկ Հովհաննիսյանն ասաց, որ չեղարկվել է նաև դեկտեմբերի 16-ի չվերթը, սակայն պատճառն իմանալու համար խորհուրդ տվեց դիմել հենց ավիաընկերությանը։ «Չվերթի չեղարկման պատճառներն ավիաընկերությունից կարող եք ճշտել։ Այսօրվա և վաղվա չվերթներն են հետաձգվել։ Հետագայի մասին այս պահին տեղեկություն չունեմ»,-նշեց Սաթենիկ Հովհաննիսյանը։ «Փաստինֆո»-ն փորձեց կապ հաստատել «Flyone Armenia» ավիաընկերության հետ՝ հստակեցնելու չվերթների չեղարկման պատճառները, սակայն ընկերությունից մեր զանգերին չպատասխանեցին։ Նշենք, որ ըստ մամուլում շրջանառվող տեղեկությունների՝ Երևան-Մոսկվա ուղղությամբ չվերթի չեղարկման պատճառն այն է, որ Ռուսաստանը թույլտվություն չի տվել ընկերությանը թռիչքներ իրականացնել ՌԴ քաղաքներ։ Հիշեցնենք, որ «Flyone Armenia» ավիաընկերությունը պատկանում է իշխանական պատգամավոր, գործարար Խաչատուր Սուքիասյանին։