Այսօր լրանում է 1988-ի ավերիչ երկրաշարժի 33-րդ տարելիցը: 1988 թվականի դեկտեմբերի 7-ին՝ 11:41-ին, Հայաստանի հյուսիսում տեղի ունեցավ ավերիչ երկրաշարժ՝ 10 բալ ուժգնությամբ:
Հաշված վայրկյանների ընթացքում լրիվ կամ մասնակի ավերվեցին Սպիտակ, Լենինական, Կիրովական, Ստեփանավան քաղաքները, Սպիտակի, Ախուրյանի, Գուգարքի, Արագածի, Կալինինոյի, Ստեփանավանի շրջանների հարյուրից ավելի գյուղեր ու բնակավայրեր:
33 տարի առաջ տեղի ունեցած ավերիչ երկրաշարժի հետևանքով տուժեցին հանրապետության ավելի քան 21 քաղաք և շրջան, 342 գյուղ, անօթևան դարձան՝ 514 հազար մարդ: Բնական աղետը խլեց ավելի քան 25 հազար մարդու կյանք, վիրավորվեց մոտ 20 հազարը:
Զոհերը հատկապես շատ էին հանրապետության երկրորդ քաղաք Լենինականում՝ մոտ 15-17 հազար իսկ Սպիտակում՝ 4 հազար մարդ: Սպիտակի երկրաշարժի հետևանքով ավերվեց Հայաստանի բնակֆոնդի 17 տոկոսը, ավերակների վերածվեցին բազմաթիվ գործարաններ, պատմական հուշարձաններ և այլ նշանակության շինություններ:
Աղետալի երկրաշարժից հետո Ռուսաստանից Հայաստան ժամանեց հատուկ հանձնաժողով՝ ԽՍՀՄ Մինիստրների խորհրդի նախագահ Նիկոլայ Ռիժկովի ղեկավարությամբ։
Հայաստանին այդ օրերին օգնության ձեռք մեկնեցին աշխարհի ավելի քան 113 երկիր և 7 միջազգային կազմակերպություն: