Նախագահ Էմանուել Մակրոնը բանակցություններ է վարել ԱՄՆ պետքարտուղար Էնթոնի Բլինքենի հետ՝ ամերիկացի պաշտոնյայի հետ առաջին հանդիպման ժամանակ, այն բանից հետո, երբ Ավստրալիայի հետ սուզանավերի պայմանագրի դադարեցումը ճգնաժամ է առաջացրել Փարիզի եւ Վաշինգտոնի միջեւ, հաղորդում է AFP-ն:
Բլինքենը, ով փորձում էր շտկել հարաբերությունները Ֆրանսիայի հետ այն բանից հետո, երբ Կանբերան դուրս եկավ Մեծ Բրիտանիայի եւ ԱՄՆ-ի հետ անվտանգության պայմանագրից, Փարիզ երկօրյա այցի շրջանակներում ի սկզբանե չէր ծրագրում հանդիպել Մակրոնի հետ:
Դեմ առ դեմ հանդիպումը տեւել է մոտ 40 րոպե՝ «փոխհամաձայնությամբ, որ մենք այժմ հնարավորություն ունենք խորացնելու եւ ամրապնդելու համակարգումը», չնայած «դեռ շատ ծանր աշխատանք կա անելու», ասել է Պետդեպարտամենտի բարձրաստիճան պաշտոնյան։
Ելիսեյան պալատը նույնպես հաստատել է Մակրոնի հետ հանդիպումը՝ հայտարարելով, որ Բլինքենի այցը կօգնի «վերականգնել վստահությունը» կողմերի միջեւ:
Մակրոնը սաստիկ զայրացել էր անցյալ ամիս, երբ Ավստրալիան հրաժարվել էր ֆրանսիական սուզանավերի ձեռքբերման բազմամիլիարդանոց պայմանագրից՝ ասելով, որ դրա փոխարեն կօգտագործի ամերիկյան միջուկային տարբերակները:
Մակրոնի կառավարությունը չեղարկմանը հանգեցրած գաղտնի բանակցություններն անվանել էր «հարված թիկունքից», իսկ Ֆրանսիայի նախագահը հետ էր կանչել դեսպաններին Վաշինգտոնից եւ Կանբերայից:
Երեքշաբթի ավելի վաղ Բլինքենը հանդիպել էր ֆրանսիացի գործընկեր Ժան-Իվ Լե Դրիանի հետ: Լե Դրիանի մամուլի քարտուղարը սա հնարավորություն է անվանել «նշելու այն նշաձողերը, որոնք կարող են օգնել վերականգնել վստահությունը մեր երկու երկրների միջեւ»:
Այնուհետեւ նա ուղեւորվել է Ելիսեյան պալատ՝ Մակրոնի անվտանգության հարցերով խորհրդական Էմանուել Բոնի հետ պլանավորված հանդիպման համար, սակայն «այնուհետեւ մոտ 30 կամ 40 րոպե դեմ առ դեմ հանդիպել է նախագահ Մակրոնի հետ»,- ասել է պետքարտուղարության խոսնակը:
Պաշտոնյայի խոսքով՝ հանդիպման տրամադրությունը «լուրջ» է եղել: «Չեմ ուզում բնութագրել նրանց հույզերը, բայց ես կասեի, որ գոնե մեր քննարկումներում, այն շատ ջերմ եւ ընկերական էր»: Պաշտոնյան ասել է, որ բանակցությունները ներառել են Հնդկախաղաղօվկիանոսյան տարածաշրջանը, համագործակցությունը Սահելում եւ ԵՄ-ՆԱՏՕ-ում:
00:00:00
