Անվտանգության Խրոհրդի քարտուղար Արմեն Գրիգորյանը լրատվամիջոցներից մեկին տված հարցազրույցի ժամանակ հայտարարել է, որ իրենք խոստացել էին կադրային ջարդ և իրականացնելու են դա։ Բացի այդ, նա ասել էր, որ համակարգերը պետք է ենթարկվեն իշխող խմբակցությանը և որ մտադրություն ունեն ժամկետային պարտադիր զինծառայությունը մեկուկես տարի դարձնել։

Բանակում բարեփոխումենրի, ժամկետային զինծառայության ժամկետի կրճատման մասին ArmDaily.am-ի հետ զրույցում «Ռազմինֆո» մասնագիտացված կայքի համակարգող Կարեն Վրթանեսյանն ասաց, որ շատ երկար խոսակցություն է, թե ինչ խնդիրներ պետք է լուծվեն բանակում, ինչ բարեփոխումներ կիրառվեն ու ինչ խնդիրներ բանակը չպետք է լուծի։ «Ըստ էության, հարց է առաջանում՝ ներկա իշխանությունները ինչ նպատակներ են դնում բանակի առջև, որովհետև ավանդական նպատակը Հայաստանի տարածքային ամբողջականությունը պաշտպանելու և այլն, այդ խնդրի լուծմամբ, դատելով վերջին ամիսների իրադարձություններից՝ ՀՀ Զինված Ուժերը այդ խնդիրը չեն կարողանում լուծել։ Եվ ելնելով այդ իրականությունից՝ հարց է առաջանում ընդհանրապես ի՞նչ խնդիրներ են ՀՀ իշխանությունները դնում ՀՀ Զինված Ուժերի առջև։ Մինչև խոսելը որևէ բարեփոխումի մասին, նախևառաջ պետք է հասկանալ՝ մեր բանակը ի վերջո ի՞նչ խնդիրներ պետք է լուծի։ Եթե ասում են, օրինակ, ժամկետային զինծառայությունը կրճատվի, ի դեպ, ոչ պաշտոնական խոսակցություններում հաճախ, նամանավանդ ընտրություններից առաջ, խոստանում էին որ ընդհանրապես պարտադիր զինծառայություն չի լինելու այլև, այսինքն մենք պետք է հասկանանք ինչ խնդիրներ է բանակը լուծելու»,-ասաց Վրթանեսյանը։

Փորձագետը նշեց, որ դրա գիտակցումը, հստակ պատասխան կամ այդ թեմայով քննարկումներ այս պահին ընդհանրապես պատերազմից հետո ինքը չի տեսել, չեն եղել նման հանրային քննարկումներ։ Նա նշում է, որ երկրորդ հարցն այն է, թե ներկա իշխանություններն ընդհանրապես ի վիճակի՞ են ինչ-որ բան բարեփոխելու.«Փորձը ցույց է տալիս երեք տարվա մեկը մյուսի վրա եկած աղետների, որ այս իշխանությունները ընդունակ չեն պետականաշինության, ընդունակ չեն բանակ կառուցելուն, ընդհանրապես որևէ ստեղծագործական աշխատանքի ընդունակ չեն։ Ըստ այդմ, թե ի՞նչ է արվելու, ինչպե՞ս է արվելու, այդ բարեփոխումներ գեղեցիկ բառի տակ ի՞նչ է թաքնված, հնարավոր չի վստահ ինչ-որ բան ասել, գուցե հոռետեսական հնչի ասածս, բայց , ամենայն հավանականությամբ, խոսքը քանակի կրճատման մասին է, ամենայն հավանականությամբ խոսքը բանակի երևի կրճատման, թուլացման, կարևորության իջեցման և այլն։ Այսինքն, ներկա իշխանությունները կարծես թե շեշտը դնում են, որ այլ երկրներն են ապահովելու Հայաստանի անվտանգությունը, ինչն իհարկե քաղաքական առումով խայտառակ վատ հետևանքներ է ունենալու երկրի համար, բայց ամենայն հավանականությամբ ոչ միայն այդ բարեփոխումները որևէ բան դեպի լավն են փոխելու, այլեւ ընդհակառակը՝ բերելու են, իմ կարծիքով ու դատելով նախորդ փորձից, բերելու են բանակի էլ ավելի թուլացմանը, էլ ավելի անկարող դառնալուն»,-ասաց «Ռազմինֆո» մասնագիտացված կայքի համակարգողը։