Քաղաքագետ Արմեն Բադալյանի դիտարկմամբ, այսպես կոչված, մարդ-կուսակցությունների ներկայացուցիչների հետ հանդիպումը վարչապետի պաշտոնակատար Նիկոլ Փաշինյանի PR անելու նպատակ ուներ: «Ցույց են ուզում տալ, թե տեսեք վարչապետն այնքան կարեւոր է, ազգի պապա է, որ իր հաղթանակն ընդունում են ընտրությունների մյուս մասնակիցները: Եթե հիշում եք՝ ժամանակին այսպես էր անում նաեւ երրորդ նախագահը, երբ մարդ-կուսակցություններին հավաքեց մարզահամերգային համալիրի դահլիճում ու իբր քաղաքական կոնսուլտացիաներ արեց քաղաքական ուժերի հետ , այն ժամանակ էլ իշխող քաղաքական ուժի ներկայացուցիչները, որոնք այսօր ընդդիմություն են , խիստ կարեւորում էին այդ հանդիպումները, իսկ ընդդիմադիրները, որոնք այսօր իշխանության են, քննադատում էին, հիմա տեղերով փոխվել են: Այն, ինչ քննադատում էին նախկինում ընդդիմադիրներն, այսօր իշխանություն են, նույնը կրկնում են ու ընդամենը վարչապետի անձնական PR-ն են անում»,- ասաց քաղաքագետը: Արմեն Բադալյանը նկատեց, որ թեեւ Փաշինյանը վերջին հանրահավաքում կոչ էր անում վերջ դնել ատելության խոսքին, սակայն գործով հակառակն է անում. «Տեսնում ենք բժշկին մեկ ամսով կալանավորում են, իսկ նման կալանք չէր լինի, եթե չլիներ իշխանության պահանջը: Այնպես որ, նման հանդիպումներին բանի տեղ մի դրեք: Մասնակիցների մի մասը գնացին հանդիպման՝ հույս ունենալով, որ հեսա իրենց պաշտոն կտան, մի մասը գնում է այն հույսով, որ իրենց միգուցե մի ուրիշ տեղ պաշտոն կտան եւ այլն: Պաշտոնի կռիվ է, բայց պաշտոն չեն ստանալու»: Քաղաքագետի համոզմամբ, վարչապետի պաշտոնակատարի հայտարարությունը, թե համերաշխության ձեռք են մեկնում բոլորին, կեղծ էր. «Նպատակն արտահայտվում է գործով, եթե երեք տարի շարունակ ընդամենը ատելություն են քարոզել, ընդամենը պայքար նախկինների դեմ եւ ոչինչ, ինչ համերաշխություն. խնդիրն այն է, որ իրենք չունեն հայեցակարգային զարգացման որեւէ տեսլական, ուղղություն, դեպի առաջ չեն նայում, այլ միշտ նայում են դեպի հետ...իրենց կողմնակիցներին իրենց կողքին պահելու համար անընդհատ քննադատում են նախկիններին, այ հեսա նախկինները կգան, այս կանեն, այն կանեն, հետեւաբար, նրանք չեն կարող համերաշխության քարոզ անել եւ շարունակելու են ձերբակալել, դատել, որ կողմանկիցներին չկորցնեն»: Irakanum.am