ՀՀ վարչական դատարանը երկրորդ անգամ անվավեր է ճանաչել ՀՀ կենտրոնական ընտրական հանձնաժողովի որոշումը՝ «Հայաստան» դաշինքի պատգամավորի թեկնածու Ռոբերտ Քոչարյանի հեղինակած «Կյանք և ազատություն» գրքի պատկերով և «Հայաստանը կառուցելիս» գրառմամբ պաստառը քարոզչության հետ ասոցացվող ճանաչելու մասին։ Ինչպես արդեն տեղեկացրել ենք՝ մայիսի 31-ին ԿԸՀ-ն որոշում էր կայացրել, համաձայն որի՝ Ռոբերտ Քոչարյանի «Կյանք և Ազատություն» գրքի պատկերը և «Հայաստանը կառուցելիս» գրառումը պարունակող պաստառներն ասոցացվել են «Հայաստան» դաշինքի նախընտրական քարոզչության հետ։ Ռոբերտ Քոչարյանը հայցադիմում էր ներկայացրել Վարչական դատարան՝ պահանջելով անվավեր ճանաչել որոշումը, որը հունիսի 6-ին բավարարվել է։ Դատարանի որոշումից հետո՝ հունիսի 8-ին ԿԸՀ-ն կրկին որոշում է կայացրել, համաձայն որի՝ ՀՀ երկրորդ նախագահ Ռոբերտ Քոչարյանի «Կյանք և ազատություն» գրքի պատկերով և «Հայաստանը կառուցելիս» գրառմամբ պաստառը ճանաչվել է քարոզչության հետ ասոցացվող։ Հունիսի 8-ի որոշումը կրկին վիճարկվել է դատական կարգով, որի շրջանակներում հայցվոր կողմը Դատարանին հայտնել է, որ առկա է նույնանման փաստերի վերաբերյալ օրինական ուժի մեջ մտած վճռով անվավեր ճանաչված վարչական ակտ։ Հայցվոր կողմի ներկայացուցիչը մատնանշել է կրկին դատվելու անթույլատրելիության պահանջը (սկզբունքը), որը նախատեսված է ՀՀ Սահմանադրության 22-րդ հոդվածի 7-րդ մասում, սահմանված է մի շարք միջազգային պայմանագրերով, այդ թվում՝ Քաղաքացիական և քաղաքական իրավունքների մասին միջազգային դաշնագրի 14-րդ հոդվածի 7-րդ կետով, Մարդու իրավունքների եվրոպական կոնվենցիայի 7-րդ արձանագրության 4-րդ հոդվածով, որն իր բովանդակությամբ (մեկնաբանմամբ) ենթադրում է պետության պարտականությունը՝ նույն արարքի համար անձին կրկին անգամ պատժելը, դատելը և քրեական հետապնդման ենթարկելը բացառելը: Վարչական դատարանը նշել է, որ ԿԸՀ-ն, խախտելով իրավական որոշակիության սահմանադրական սկզբունքը, դատական կարգով անվավեր ճանաչված միջամտող վարչական ակտով կարգավորված՝ 5 քառակուսի մետրը գերազանցող մակերեսով՝ Ռոբերտ Քոչարյանի «Կյանք և ազատություն» գրքի պատկերով և «Հայաստանը կառուցելիս» գրառմամբ պաստառը նախընտրական քարոզչության հետ ասոցացվող ճանաչելու հարցի շուրջ կրկին իրականացրել է վարչարարություն և արդյունքում ընդունել արդեն սույն գործի շրջանակներում վիճարկվող՝ 08.06.2021թ. թիվ 128-Ա որոշումը, որով Ռոբերտ Քոչարյանի փաստացի դրությունը կրկին վատթարացրել է, քանի որ վերջինիս «Կյանք և ազատություն» գրքի պատկերը և «Հայաստանը կառուցելիս» գրառումը պարունակող պաստառները ճանաչել է «Հայաստան» դաշինքի նախընտրական քարոզչության հետ ասոցացվող: Դատարանի գնահատմամբ՝ ԿԸՀ-ն ոչ պատշաճ վարչարարության արդյունքում ընդունել է մայիսի 31-ի որոշումը, ապա այդ որոշումը դատական կարգով անվավեր ճանաչելուց հետո շտկել է դատական ակտով արձանագրված խախտումները և կրկին նույն փաստերով նույն հարցի կարգավորման նպատակով ընդունել է մեկ այլ որոշում, այնինչ ոչ պատշաճ վարչարարության հիմքով միջամտող վարչական ակտն անվավեր ճանաչելը ոչ թե նպատակ է հետապնդում, որ հենց այդ վարչարարությունը կրկին «վերաբացվի» և ճիշտ իրականացվի, այլ դրա հիմքով բացառվեն հետագայում վարչական մարմնի կողմից նման խախտումներ թույլ տալը: Հաշվի առնելով վերոգրյալը՝ Վարչական դատարանը գտել է, որ վարչական ակտը ոչ իրավաչափ է և ենթակա է անվավեր ճանաչման։