Ժողովրդի ներկայությունը նաեւ ապացուցում է, որ ամբողջ հայ ժողովուրդը գնահատում է լեգենդար հրամանատար Արկադի Տեր-Թադեւոսյանին։ Այս մասին այսօր՝ ապրիլի 2-ին, լեգենդար հրամանատար Արկադի Տեր-Թադեւոսյանի հոգեհանգստի ժամանակ լրագրողների հետ զրույցում ասաց ազատամարտիկ, «Սասնա ծռեր» շարժման անդամ Ժիրայր Սեֆիլյանը։ «Արկադիի մասին նոր բան ասել հնարավոր չէ, ամեն ինչ ասված է։ Բոլորիս համար շատ ցավալի է, որ մենք կորցրինք այսպիսի ժամանակահատվածում։ Ճիշտ պիտի լիներ, որ մեր մեծերը աշխարհիկ կյանքից հեռանային ավելի հանգիստ հոգով։  Վստահաբար, առանց նույնիսկ իմանալու հիվանդության մանրամասները, այն, ինչ տեղի ունեցավ այդ 44 օրերի ընթացքում, նաեւ դրա հետեւանքն է։ Այս պատերազմի ընթացքում եւ հետպատերազմյան ժամանակահատվածում մեկ անգամ եմ հեռախոսով զրուցել»,- նշեց նա։ Անդրադառնալով 44-օրյա պատերազմին՝ Սեֆիլյանը շեշտեց, որ Շուշիի հետ կապված դավադրություն է տեղի ունեցել.«Եվ կարող եմ ասել՝ ամբողջ պատերազմում։ Ուշ թե շուտ այդ ծալքերը բացահայտվելու են։ Պատերազմին մասնակցում են հաղթելու նպատակով։ Այդ օրերին մոռացել էինք, որ ասնակցության նպատակը դա պետք է լինի։ Ամեն դեպքում մենք չպետք է ընկճվենք եւ նույն ի հարգանքս՝ Արկադիների՝ պիտի այս ամենը վերականգնենք։ Ժողովուրդը պատրաստ էր, նույնիսկ տասնապատիկ անգամ ավելի ոգեղեն վիճակ էր, քան 1992-94 թվականներին, բայց կազմակերպչական եւ քաղաքական իմաստով հակառակն էր»։ Հիշեցնենք, որ 81-ամյա լեգենդար հրամանատար Արկադի Տեր-Թադեւոսյանը մահացել է մարտի 31-ին։ Նրա հուղարկավորությունը տեղի կունենա վաղը՝ ապրիլի 3-ին, ժամը 11.00-ին, Կոնդի Սբ.Հովհաննես եկեղեցում տեղի կունենա հոգեւոր արարողակարգ: