Հայաստանի կառավարությունը նախաձեռնել է նախագիծ, որով նախատեսում է վերացնել ՄԻՊ-ի անկախությունը կառավարությունից և ԱԺ-ում կառավարող խմբակցությունից։ «Եվ այլևս խնդիրներ բարձրացնելու համար քաղաքական իշխանության մարմինները կարող են կրճատել մեր հաստատության ֆինանսավորումը», - այսօր հրավիրված մամուլի ասուլիսին ասաց ՀՀ մարդու իրավունքների պաշտպան Արման Թաթոյանը։ Նա նշեց, որ ՀՀ ՄԻՊ մասին օրենքում կա ամրագրված դրույթ, համաձայն որի՝ յուրաքանչյուր տարի պաշտպանի և նրա աշխատակազմի, ինչպես նաև կանխարգելման ազգային մեխանիզմի ֆինանսավորման համար պետական բյուջեով նախատեսված հատկացման չափը չի կարող պակաս լինել նախորդ տարվա պետական բյուջեով նախատեսված հատկացման չափից։ Նշենք, որ ՄԻՊ-ի բյուջեի կրճատման հնարավորության հարցը կառավարության մարտի 11-ի նիստում ներառված էր չզեկուցվողների ցանկում, իսկ պաշտպանն այդ մասին իմացել է նիստի ընթացքում։ ՄԻՊ տարեկան բյուջեն կազմում է 532 միլիոն դրամ, որից աշխատանքի վարձատրության համար աամբողջ մասը հանած՝ տարեկան աճը կազմել է 2 մլն 350 հազար դրամ։ Թաթոյանն ասաց, թե այս նախագիծը սկսել են քննարկել 2020 թվականի սեպտեմբերին՝ պատերազմից մի քանի օր առաջ, քննարկմանը մասնակցել է Թաթայնը և ներկայացրել սկզբունքային առարկություններ. «Այդ ժամանակ երկու հիմնարար պատճառ էր բերվում. Նախ, որ նման դրույթները խանգարում են միջազգային ներդրումներին, և երկրորդ՝ երկրում ֆինանսական բարդությունների առաջացման դեպքում տնտեսության ոլորտները վերաուղղելու համար ճկունություն չի լինում։ Սրանք ֆինանսների նախարարի պարզաբանումներն էին»։ Թաթոյանի առարկություններրը ներկայացնելուց հետո որոշում է կայացվել հետաձգել քննարկումը. «Պատերազմի ընթացքում մեր աշխատանքի մեծածավալությունը և բարդությունները տեսնելով, ենթադրում էի, որ կառավարությունը, միգուցե, հրաժարվի այս մոտեցումից, բայց այդպես չեղավ»։ Թաթոյանի խոսքով՝ այդ նախագծով վերացվում է ՄԻՊ գործունեության երաշխիքը, որպես՝ օմբուդսմեն։ «Այս նախագիծը համարում եմ խտրական, որը միայն ՄԻՊ գործունեությանն է վերաբերում և ուղղված է այն սահմանափակելուն», - ասաց պաշտպանը։