Շատ անլուրջ եմ վերաբերվում, մեղադրանքը անհիմն է, այս մասին ԱԺ-ում լրագրողների հետ զրույցում ասաց ԱԺ «Իմ քայլը» խմբակցության պատգամավոր Վահե Ղալումյանը՝ պատասխանելով հարցին, թե ինչպես է վերաբերվում նրան, որ հասարակությունը Նիկոլ Փաշինյանին և իր թիմակիցներին համարում է դավաճան, հող հանձնող։
«Ինչի մեջ են մեղադրում, դավաճանությա՞ն ․․․Ես համաձայն չեմ, որ Հայաստանում կա նման մարդ, ով հավատում է, որ մեր վարչապետը կարող է դավաճանել»,– ասաց Վահե Ղալումյանը, ում եղբայրը Նիկոլ Փաշինյանի քավորն է:
Մեր հանրության ցանկացած քաղաքացու կարծիք մեզ համար հետաքրքիր է լսել, հասկանալ խնդիրն ինչում է, իսկ ընդդիմադիր կուսակցությունները միայն հայտարարում են, որ վարչապետը պետք է հրաժարական տա:
Ըստ նրա՝ պատերազմում կրած պարտությունը հրաժարականի համար բավարար հիմնավորում չէ: Նա նշեց, որ խմբակցությունը վարչապետի հրաժարականի օրակարգ չունի: «Ես այս թեմայով խոսել եմ, նորից եմ կրկնում՝ մենք պարտվել ենք միասին. ընդդիմությունն էլ է մեր հետ եղել»,-ասաց նա:
Պատգամավորի խոսքով՝ Նոյեմբերի 10-ին ստորագրված հայտարարությունը պետք է դիտարկել այդ օրվա իրադրության համատեքստում: «Իմ կարծիքով՝ ոչ մի քաղաքական ուժ չի ասել, որ չպետք է ստորագրվեր»,-ասաց նա:
Ինչ վերաբերում է խմբակցության ներսում տարաձայնություններին, ապա Վահե Ղալումյանն ասաց, որ առանձին հարցերի շուրջ տարաձայնություններ միշտ եղել են, խմբակցությունն իր դիրքորոշումը հայտնել է և կողմ է Նիկոլի Փաշինյանի առաջիկա 6 ամիսների վերաբերյալ ճանապարհային քարտեզին։ Նա նաև նշեց, որ երկրի շահերը դիտարկելով՝ համարում են, որ Նիկոլ Փաշինյանը պետք է շարունակի պաշտոնավարել:
Անդրադառնալով դիտարկմանը, որ կարծես Ոստիկանությունն այլևս չի ենթարկվում իշխանություններին, քանի որ երեկ տարբեր փողոցներ փակվել էին, իսկ Ոստիկանությունը ակտիվ չէր միջամտում, Վահե Ղալումյանն ասաց.
«Խցանումներից մեկի մեջ իմ ծանոթն էր, ով անմիջապես զանգեց ինձ ու նշեց, որ տվյալ ակցիային ոստիկանության ուժերը չեն կարողանում մոտենալ, քանի որ ճանապարհը խցանված է: Տեսել էին ոտքով մոտեցող ոստիկանների»,- ասաց նա:
00:00:00
