Facebook-ի հիմնադիր եւ սեփականատեր Մարկ Ցուկերբերգի հարստությունն առաջին անգամ գերազանցել է 100 միլիարդ դոլարը, գրում է Bloomberg-ը: Այսպիսով, աշխարհում նոր ուլտրահարուստ մարդ է հայտնվել` Amazon-ի հիմնադիր Զեֆ Բեզոսից եւ Microsoft-ի հիմնադիր Բիլ Գեյթսից բացի: Ցուկերբերգի հարստության աճը պայմանավորված էր Facebook-ի արժեթղթերի շրջանառության ավելացմամբ իրեն պատկանող Instagram-ի կողմից նոր Reels ծառայության գործարկման արդյունքում: Reels-ը նման է չինական TikTok հավելվածին, որի դեմ վերջերս ԱՄՆ իշխանությունները պայքար են մղում` ամերիացի օգտատերերի անձնական տվյալների` չինական հատուկ ծառայություններին փոխանցման մտահոգությունների պատճառով, հայտնում է Lenta-ն: Այս պահի դրությամբ Ցուկերբերգի ունեցվածքը Bloomberg-ի կողմից 100 միլիարդ դոլար է գնահատվում: Բեզոսը 190 միլիարդ դոլարի ակտիվներ ունի, Գեյթսը` 120 միլիարդ դոլարի: Ավելի վաղ 100 միլիարդ դոլարի շեմը հատել էր ֆրանսիական LVMH նորաձեւության տան գլխավոր բաժնետեր Բեռնար Առնոն, սակայն այժմ նրա ունեցվածքը 81.4 միլիարդ դոլար է կազմում, ինչը նրան թույլ է տալիս զբաղեցնել չորրորդ տեղը համաշխարհային վարկանիշային աղյուսակում: