Ամերիկյան Microsoft ընկերության համահիմնադիր Բիլ Գեյթսը հայտնել է, որ նոր տեսակի կորոնավիրուսի համավարակի հետևանքով ստեղծված կարանտինային ռեժիմից մարդիկ կարող են բնականոն կյանքի վերադառնալ միայն կորոնավիրուսի դեմ պատվաստանյութի առկայության և դրա լիարժեք հասանելիության դեպքում, գրում է scmp.com կայքը։ Սպասվում է, որ կորոնավիրուսի դեմ պատվաստանյութը հաջորդ տարվանից շուտ հասանելի չի լինի։ «Զարգացած երկրները, ինչպես ԱՄՆ-ն, վաղ թե ուշ կկարողանան հաղթել վիրուսին, սակայն այն պետք է հաղթահարել համաշխարհային մակարդակով»,- նշել է Գեյթսը կիրակի Fox News լրատվականին տված հարցազրույցի ընթացքում։ «Կյանքի սովորական ռիթմին չենք կարող վերադառնալ, մինչև որ պատվաստանյութը չլինի, ամբողջ աշխարհը չի կարողանա վերադառնալ․․․»,- նշել է Գեյթսը։ Ինչպես ավելի վաղ հայտնել էինք, Գեյթսը, նշելով, թե կորոնավիրուսի հաղթահարման համար որոնք պետք է լինեն ԱՄՆ կառավարության հետագա քայլերը, խոսել էր պատվաստանյութի ստեղծման վրա կենտրոնանալու անհրաժեշտության մասին։ «Արդեն հիմա կարելի է սկսել գործարաններ կառուցել, որտեղ այդ պատվաստանյութերը կարտադրվեն, և գնել տարբեր դեղամիջոցների պատրաստման համար անհրաժեշտ սարքավորումներ։ Այս գործում կարևոր դեր պետք է կատարի դաշնային կառավարությունը, քանի որ մասնավոր ընկերությունները չեն կարող իրենց վրա նման ռիսկ վերցնել»,- կարծում է Գեյթսը։ Հայտնի է, որ գործարարը դեռևս հինգ տարի առաջ էր կանխատեսել, որ մարդկության համար ամենամեծ սպառնալիքներից են համարվում վիրուսները, որոնց դեմ պայքարին աշխարհը դեռևս պատրաստ չէ։