Թուրք ոստիկանները մոտ 150 կգ հերոին տեսակի թմրանյութ են առգրավել երկրի արևելյան շրջանում: Ինչպես տեղեկացնում է РИА Новости-ն՝ հղում անելով թուրքական աղբյուրին, թմրանյութը հայտնաբերվել է իրանական համարանիշով բեռնատարի թափքում:
Աղբյուրի տվյալներով՝ Աղրը նահանգի Թաշլըչայ շրջանի ոստիկանության վարչության աշխատակիցները կանգնեցրել են իրանական համարանիշով բեռնատարը, քանի որ ավելի վաղ տեղեկություն էին ստացել, որ տեղափոխվող բեռում կարող է թմրանյութ լինել: Հայտնաբերված հերոինի ընդհանուր զանգվածը կազմել է 149 կգ 36 գրամ:
Թուրքական աղբյուրի հաղորդմամբ՝ բեռնատարի վարորդը, որն իրանական քաղաքացիություն ունի, ձերբակալվել է: Կատարվածի առնչությամբ հետաքննություն է սկսվել:
