Պեկինի իշխանությունները ժամանակավոր արգելք են սահմանել խմբակային խնջույքների, բանկետների, ինչպես նաև հանրային սննդի ծառայությունների ներգրավմամբ միջոցառումներ անցկացնելու վրա: Այս մասին հայտնում է РИА Новости-ն՝ վկայակոչելով Չինաստանի մայրաքաղաքի առողջապահական հանձնաժողովի հայտարարությանը: Հայտարարության մեջ նշվում է, որ սննդի ծառայությունները պետք է նախապես տեղեկացնեն հաճախորդներին իրադարձությունների չեղյալ հայտարարման կամ հետաձգման մասին: Բացի դրանից՝ քաղաքից դուրս տարբեր միջոցառումների կազմակերպիչները նույնպես պետք է չեղյալ հայտարարեն միջոցառումները այնքան ժամանակ, մինչ միջոցներ են ձեռնարկվում կորոնավիրուսի տարածումը կանխելու համար: