Իսպանացի բռնակալ Ֆրանսիսկո Ֆրանկոն (1892-1975թթ․) իր կնոջը՝ Կարմեն Պոլոյին եւ դստերը՝ Կարմենին 28,5 մլն պեսետ եվրոյի ժառանգություն է թողել, հայտնում է ՏԱՍՍ-ը՝ հղում կատարելով El Mundo-ին։ Ըստ լրատվամիջոցի՝ այդ գումարն այսօրվա դրությամբ համարժեք է 1,8 մլն եվրոյի։ Նշվում է, որ կտակը կազմվել է 1968թ․ փետրվարի 20-ին, այսինքն բռնակալի մահվանից մոտ ութ տարի առաջ։ Փաստաթղթում հիմնականում խոսվում է անշարժ գույքի, այդ թվում Սադա քաղաքում կալվածքի մասին։ Ֆրանկոյի անձի հանդեպ հատուկ ուշադրությունը կրկին սեւեռվել էր Մադրիդի մոտակայքում «Ընկածների հարթավայր» հուշահամալիրից նրա աճյունը տեղափոխելուց հետո։ Արտաշիրմումը կատարվել է հոկտեմբերի 24-ին։ Պրոցեդուրայից առաջ համալիրը այցելուների համար փակվել է։ Դագաղը, որի մեջ 44 տարի առաջ թաղվել էր դիկտատորը, հանելու համար բարձրացվել է գերեզմանը ծածկող 1,5 տոննայանոց գրանիտե սալիկը։ Այնուհետեւ աճյունը ուղղաթիռով տեղափոխվել է Մինգորուբիոյի գերեզմանատուն, որտեղ կրկին հուղարկավորվել է։ Արարողությունն անցկացվել է մամուլի համար փակ պայմաններում։ Դրան մասնակցել են Ֆրանկոյի ընդամենը 22 հարազատներ։ Մինչեւ թաղելը կատարվել է հրաժեշտի արարողություն։ Բռնակալի թաղման նոր տեղը գտնվում է դամբարանում, որտեղ 1988թ․ թաղվել էր նրա կինը։