ԱՄՆ-ի Ներկայացուցիչների պալատի խոսնակ Նենսի Փելոսին հայտարարել է, որ ԱՄՆ-ի նախագահ Դոնալդ Թրամփի իմփիչմենթի գործընթացի շրջանակում լսումները կարող են մեկնարկել նոյեմբերին, հաղորդում է ՌԻԱ Նովոստի-ն:
«Ես կարծում եմ, որ նոյեմբերին կկայանան հանրային լսումները»,-հայտարարել է Փելոսին Բլումբերգ գործակալության լրագրողների հետ կլոր սեղանի ժամանակ:
Ընդ որում՝ խոսնակը նշել է, որ իմփեիչմենթի գործընթացի շրջանակում հետաքննությունն ավարտելու վերջնաժամկետ չկա: «Ես չգիտեմ, թե ինչպիսի ժամանակացույց կլինի…Մենք դեռեւս որոշում չենք կայացրել, թե արդյոք նախագահը կենթարկվի իմփիչմենթի»,-հավելել է նա:
Հինգշաբթի ԱՄՆ-ի ներկայացուցիչների պալատի մեծամասնությունը կողմ էր քվեարկել եւ ընդունել բանաձեւը, որը ենթադրում է Թրամփի իմփիչմենթի գործընթացի սկիզբը: Փաստաթուղթն ընդունելու դեմ են քվեարկել բոլոր հանրապետականները, որոնք Ներկայացուցիչների պալատում փոքրամասնություն են կազմում:
Դեմոկրատները Թրամփի իմփիչմենթի գործընթացն սկսել են Ուկրաինայի նախագահ Վլադիմիր Զելենսկու վրա ենթադրյալ ճնշման պատճառով, վերջինս պետք է հետաքննություն սկսեր Թրամփի քաղաքական ընդդիմադրի՝ նախկին փոխնախագահ Ջո Բայդենի դեմ։ Ինքը՝ Թրամփը, ասում է, որ ուկրաինական իշխանություններին կոչ է արել միայն պայքարել կոռուպցիայի դեմ, ինչի իրավունքն ուներ։ Բայդենի որդին աշխատում էր ուկրաինական Burisma էներգաընկերության տնօրենների խորհրդում, եւ Թրամփը տեսություն էր առաջադրել, որ Բայդեն-ավագը հասել է այն բանին, որպեսզ դադարեցվի Burisma-ի դեմ հետաքննությունը եւ աշխատանքից ազատվի Ուկրաինայի գլխավոր քարտուղար Վիկտոր Շոկինը։ Դեմոկրատները հայտարարում են, որ փաստերը չեն հաստատում այս տեսությունը, եւ Թրամփին մեղադրում են օտարերկրյա օգնությամբ քաղաքական հակառակորդից ազատվելու փորձի մեջ։
00:00:00
