ԱՄՆ իշխանություններն ուտիլիզացրել են «Իսլամական պետության» ղեկավար Աբու Բաքրա Ալ Բաղդադիի մարմինը։ Այս մասին հայտարարել է ԱՄՆ շտաբերի պետերի միացյալ հանձնաժողովի նախագահ, բանակի գեներալ Մայք Միլին, հայտնում է CBS News-ը։ Ավելի վաղ ԱՄՆ նախագահ Դոնալդ Թրամփը հայտնել էր, որ Ալ Բաղդադին ամերիկյան զինվորականների մոտենալու պահին պայթեցրել է մահապարտի բաճկոնը։ «Նրա մնացորդների ուտիլիզացիան արդեն կատարվել է, այն արվել է պատշաճ կերպով»,- Պենտագոնում ճեպազրույցի ժամանակ ասել է Միլին։ Նա հայտնել է, որ գործողության ընթացքում կալանավորված երկու տղամարդ ԱՄՆ-ի բանտում են։ Միլին նշել է, որ Պենտագոնում կան այն մարտարշավի տեսագրությունները եւ լուսանկարները, որի ժամանակ սպանվել է ԻՊ-ի ղեկավարը։ Նրա խոսքերով, հենց որ դրանք ստուգվեն եւ գաղտնազերծվեն, կարող են հրապարակվել։ Պատասխանելով այն հարցին, թե արդյոք կյանքի վերջին րոպեներին Բաղդադին «հեծկլտացել եւ լացել է», ինչպես նախկինում հայտարարել էր Թրամփը, Միլին ենթադրել է, որ նախագահը, հնարավոր է, խոսել է մարտարշավին մասնակցած ստորաբաժանումների անդամների հետ, իսկ ինքը դեռեւս նրանց հետ չի խոսել։ Նա նշել է, որ ամերիկյան զինվորականները չեն տուժել գործողության ժամանակ, սակայն շունը, որ մասնակցել է առաքելությանը, վիրավորվել է։ Պաշտպանության նախարար Մարկ Էսպերը զգուշացրել է, որ «Սիրիայում անվտանգության հետ կապված իրավիճակը բարդ է մնում»։ Միաժամանակ, նա նշել է, որ ԱՄՆ-ի պարտականությունների մեջ չի մտնում «յուրաքանչյուր վեճի լուծման համար ոստիկանի դեր կատարելը»։ Էսպերը հավաստիացրել է, որ տարածաշրջանի նավթային հանքավայրերը պաշտպանված են։ Նա նաեւ ասել է, որ ինքը ՆԱՏՕ-ի համաժողովում անցյալ շաբաթ խոսել է ԱՄՆ-ի դաշնակիցների հետ եւ հաստատել է ԻՊ-ի դեմ պայքարին ԱՄՆ-ի հավատարմությունը ու կոչ է արել նրանց օգնել առաքելության իրականացման հարցում։ Էսպերը նաեւ ասել է, որ Թուրքիան նախկինի պես պատասխանատվություն է կրում այն բանի համար, որ «չհիմնավորված ներխուժել է հյուսիսային Սիրիա, ինչն էլ հանգեցրել է տարածաշրջանում հետագա անկայունության»։