Այս տարի կինովարձույթում հոլիվուդյան հանրահայտ դերասանուհի Սքարլեթ Յոհանսոնի մասնակցությամբ երկու ֆիլմ է հայտնվել, դերասանուհին պատրաստվում է իր մոտալուտ հարսանիքին և միևնույն ժամանակ խնամում է իր 5-ամյա դստերը, գրում է ET-ն:
Չնայած զբաղված աշխատանքային գրաֆիկին՝ դերասանուհին ներկա է գտնվել Elle ֆրանսիական ամսագրի կազմակերպած «Կանայք Հոլիվուդում» միջոցառմանը և քայլել է կարմիր գորգի վրայով: Միջոցառման ընթացքում դերասանուհին պատասխանել է ET-ի լրագրողի հարցերին:
Իր աշխատանքային և անձնական կյանքը համատեղելու մասին հարցին դերասանուհին պատասխանել է, որ իրականում չի կարողանում համատեղել:
«Կարծում եմ՝ դա միֆ է: Իրականում ամեն ինչ համատեղելն անհնար է»,- հայտնել է դերասանուհին:
Աղբյուրը հաղորդում է, որ նա առաջիկայում չի պատրաստվում նոր առաջարկներ ընդունել: Սակայն վերջերս ամերիկացի քանթրի երգչուհի և դերասանուհի Դոլի Փարթոնը խոստովանել էր, որ իր մասին ինքնակենսագրական ֆիլմ նկարահանելու դեպքում կցանկանար, որ իրեն մարմնավորի Յոհանսոնը:
Դերի առաջարկն ընդունելու մասին հարցին ի պատասխան Յոհանսոնն ասել է. «Նա բացառիկ կին է. ուժեղ անհատականության մարմնավորում: Ուստի՝ հնարավոր է»:
